Sansar News
काठमाडौँ । नेपाल राष्ट्र बैंकले भुक्तानी सेवा प्रदायक संस्था ’नेपाल ई बिज म्यानेजमेन्ट प्राइभेट लिमिटेड’ लाई प्रदान गरेको अनुमतिपत्र स्वतः रद्द भएको जनाएको छ ।
केन्द्रीय बैंकको भुक्तानी प्रणाली विभागले एक सूचना जारी गर्दै उक्त जानकारी दिएको हो ।
राष्ट्र बैंकका अनुसार भुक्तानी तथा फस्र्योट ऐन, २०७५ को दफा १३ को उपदफा (६) बमोजिम उक्त संस्थालाई विक्रम संवत २०७७ फागुन १८ गते प्रदान गरिएको भुक्तानी सेवा प्रदायकको अनुमतिपत्र स्वतः रद्द भएको हो ।
साथै अनुमतिपत्र रद्द भएसँगै राष्ट्र बैंकले उक्त संस्थाले जारी गरेका भुक्तानी उपकरणहरू प्रयोग गर्ने ग्राहकहरूलाई आफ्नो हरहिसाब तथा लेनदेन बाँकी भए समयमै बुझ्न सूचित गरेको छ । सूचनामा भनिएको छ, “उक्त संस्थासँग कुनै लेनदेन बाँकी रहेका ग्राहकहरूले यो सूचना प्रकाशन भएको मितिले ३० दिनभित्र सम्बन्धित संस्थामा सम्पर्क राख्नुहुन अनुरोध गरिन्छ ।”
वि.सं.२०८३ असार ३२ बिहीवार १३:५३ मा प्रकाशित
