हामी सबैकाे संसारन्यूज

न्युजर्सी । अमेरिकाको फेयर लनमा गत जुन ६, २०२६ मा भव्य रूपमा सम्पन्न ‘नेपाल डे न्यु जर्सी २०२६’ को आय–व्यय विवरण एक विशेष समारोहका बीच सार्वजनिक गरिएको छ ।

न्यु जर्सीको एडिसनस्थित स्पाइस हाउस Spice House मा आयोजित उक्त समीक्षा तथा सम्मान कार्यक्रममा संस्थाका अध्यक्ष राजेन्द्र श्रेष्ठ र कन्भेनर संजीव श्रेष्ठले कार्यक्रमको समग्र उपलब्धि, चुनौती तथा आर्थिक आय–व्ययको विस्तृत प्रतिवेदन पूर्ण पारदर्शिताका साथ प्रस्तुत गरेका थिए ।

कार्यक्रममा उपस्थित विभिन्न संघसंस्थाका प्रतिनिधि तथा अतिथिहरूले नेपाली समुदायबीच एकता, सहकार्य र सांस्कृतिक प्रवर्द्धनका लागि नेपाल डेले पुर्‍याएको योगदानको प्रशंसा गर्दै आर्थिक पारदर्शिता प्रदर्शन गरिएको कार्यको समेत खुलेर सराहना गरे ।

सोही अवसरमा म्यारिल्यान्ड राज्यका डेलिगेट ह्यारी भण्डारीका तर्फबाट विभिन्न सामुदायिक लिडरहरूको नाममा पठाइएको ‘अफिसियल साइटेसन’  हस्तान्तरण गरिएको थियो । साथै, नेपाल डे न्यु जर्सी २०२६ लाई सफल बनाउन महत्त्वपूर्ण र विशेष योगदान पुर्‍याउने विभिन्न व्यक्तित्वहरूलाई स्थानीय समुदायका अगुवाहरूको हातबाट ‘सर्टिफिकेट अफ एप्रिसिएसन’ Certificate of Appreciation प्रदान गरी सम्मान समेत गरिएको थियो ।

न्यु जर्सी नेपाली सोसाइटी, ग्रेटर जर्सी नेपाली सोसाइटी, फ्रेन्ड्स अफ नेपाल न्यु जर्सी, इनास न्यु जर्सी (InAs nJ) र एआरसी फर नेपाल (ARC for neepal)लगायतका विभिन्न सामाजिक संस्थाका पदाधिकारी, सामुदायिक अगुवा तथा विशिष्ट व्यक्तित्वहरूको बाक्लो उपस्थिति रहेको उक्त कार्यक्रममा सहभागीहरूले आगामी वर्षहरूमा अझ भव्य, परिष्कृत र प्रभावकारी रूपमा नेपाल डे आयोजना गर्ने सामूहिक प्रतिबद्धता र विश्वास व्यक्त गरे ।