हामी सबैकाे संसारन्यूज

काठमाडौं  । नेपाली कांग्रेसले पार्टीलाई चुनावी जोडघटाउबाट मुक्त गरी विशुद्ध नागरिकका मुद्दामा केन्द्रित गर्ने उद्देश्यले आगामी साउन ७ गतेदेखि नयाँ देशव्यापी अभियान सुरु गर्ने भएको छ।

 पार्टीका सभापति गगन थापा र महामन्त्री प्रदीप पौडेलका अनुसार हाल सञ्चालन भइरहेको सांगठनिक सुदृढीकरणको ‘जरा अभियान’ सकिए लगत्तै यो नयाँ सामाजिक र नागरिक-केन्द्रित अभियान सुरु हुन लागेको हो। 

कांग्रेसको संशोधित विधानले प्रत्येक समितिका सदस्यहरूलाई ५० प्रतिशत सांगठनिक र ५० प्रतिशत सामाजिक काममा जोडिनुपर्ने व्यवस्था गरेको छ। सोही मर्मलाई व्यवहारमा उतार्न यो अभियान ल्याइएको पार्टी नेतृत्वले जनाएको छ। यस अभियानले कांग्रेसलाई ‘इलेक्सन सेन्ट्रिक’ (चुनाव केन्द्रित) दलबाट ‘सिभिक सेन्ट्रिक’ (नागरिक केन्द्रित) पार्टीमा रूपान्तरण गर्ने दाबी गरिएको छ।

पार्टीका महामन्त्री प्रदीप पौडेलका अनुसार अभियानको समयावधि र मोडालिटीबारे आन्तरिक छलफल तथा गृहकार्य भइरहेको छ। प्रारम्भिक खाकाअनुसार साउन ७ गते घोषणा भई भदौ २४ गतेसम्म सञ्चालन हुने यस अभियानले केवल राजनीतिक भाषणमा मात्र सीमित नभई सुशासन, भ्रष्टाचार नियन्त्रण, सामाजिक सेवा, जलवायु परिवर्तन र विपद् व्यवस्थापनजस्ता जनताका दैनिक सरोकारका मुद्दाहरूलाई प्रभावकारी रूपमा उठाउने तयारी गरेको छ।

गत वैशाखदेखि क्रियाशील सदस्यता अद्यावधिक र आन्तरिक संगठन बलियो बनाउन सञ्चालित ‘जरा अभियान’ साउन ६ गते जननायक बिपी कोइरालाको स्मृति दिवसका अवसरमा समापन हुँदैछ। त्यसलगत्तै यो नयाँ अभियान सुरु हुनेछ।