हामी सबैकाे संसारन्यूज

काठमाडौं । काठमाडौंमा आयोजित एक कार्यक्रममा नेपाल उद्योग वाणिज्य महासंघ का अध्यक्ष चन्द्रप्रसाद ढकालले नेपालमा लगानी आकर्षित गर्न कानुनी सुधार अपरिहार्य रहेको बताएका छन्।

भावी अध्यक्ष अञ्जन श्रेष्ठ समूहको पदाधिकारी तथा कार्यकारिणी सदस्य घोषणा कार्यक्रममा बोल्दै उनले लगानीमैत्री वातावरण निर्माणका लागि राष्ट्रिय स्तरमै व्यापक छलफल आवश्यक रहेको उल्लेख गरे। उनका अनुसार, लगानीका अवरोध हटाउन राजनीतिक दल, निजी क्षेत्र र अन्य सरोकारवालाबीच समन्वय गरेर बहस अघि बढाउनुपर्ने आवश्यकता छ।

ढकालले सोही पहलको परिणामस्वरूप सरकारले उच्चस्तरीय आर्थिक सुधार आयोग गठन गरेको जानकारी दिए। उक्त आयोगले पुराना तथा अव्यवहारिक कानुनहरू परिमार्जन गर्न विभिन्न सुझाव प्रस्तुत गरेको उनले बताए। ती सुझावका आधारमा हालसम्म ३० भन्दा बढी कानुन संशोधन भइसकेका छन् भने अन्य केही परिवर्तनको प्रक्रियामा छन्।

उनका अनुसार, आयोगमा निजी क्षेत्रको प्रतिनिधिका रूपमा आफू पनि सहभागी भएका थिए। उनले विशेषगरी व्यवसायीहरूलाई लामो समयदेखि असर पार्दै आएको कालोबजारीसम्बन्धी कानुनलगायतका प्रावधानहरूमा सुधार भएको उल्लेख गरे।

यसका साथै, उनले नेपालमा सम्भावना छैन भन्ने धारणा हटाउन निजी क्षेत्रले सक्रिय भूमिका खेलेको बताए। घरेलु लगानीबाटै ठूला परियोजना सञ्चालन गर्न सकिन्छ भन्ने उदाहरणका रूपमा १० अर्ब रुपैयाँ पूँजीको “नेपाल डेभलपमेन्ट पब्लिक लिमिटेड कम्पनी” अघि बढाइएको जानकारी उनले दिए।

उक्त कम्पनीले चरणबद्ध रूपमा आफ्ना गतिविधिहरू विस्तार गर्दै अघि बढिरहेको पनि कार्यक्रममा उल्लेख गरिएको थियो।