हामी सबैकाे संसारन्यूज

पोखरा, कास्की । देशभर सूचना प्रविधिको विकास र नीतिगत बहसलाई तीव्रता दिने उद्देश्यका साथ पर्यटकीय नगरी पोखरामा बहुप्रतीक्षित ’डिजिटल गण्डकी संवाद’ भोलि शनिबार (जेठ २३, २०८३ ÷ जुन ६, २०२६) आयोजना हुने भएको छ ।

कम्प्युटर एशोसिएशन नेपाल महासंघ (क्यान महासंघ) गण्डकी प्रदेश र क्यान महासंघ कास्की जिल्ला शाखाको संयुक्त आयोजनामा हुन लागेको हो ।

यस उच्चस्तरीय कार्यक्रममा देशका शीर्ष प्रविधि विज्ञ, दूरदर्शी नीति निर्माता, सरकारी प्रतिनिधि र उद्योगी व्यवसायीहरू एकै ठाउँमा भेला हुँदैछन् । कार्यक्रमले समसामयिक सूचना तथा सञ्चार प्रविधि (क्ष्ऋत्) का चुनौती र गण्डकी प्रदेशको डिजिटल इकोसिस्टम निर्माणका लागि व्यावहारिक खाका ब्लुप्रिन्ट तयार पार्ने आयोजकले जनाएका छन ।

डिजिटल रूपान्तरणः प्रादेशिक संवाददेखि राष्ट्रिय एजेन्डासम्म
नेपालको सूचना प्रविधि क्षेत्रलाई राष्ट्रिय गौरवको एजेन्डाका रूपमा स्थापित गर्न यो अभियान एउटा कोसेढुङ्गा सावित हुने विश्वास लिइएको छ। सूचना प्रविधि क्षेत्रका नेतृत्वकर्ता एवं क्यान महासंघका केन्द्रीय कार्यवाहक अध्यक्ष चिरञ्जीवी अधिकारीको रणनीतिक मार्गदर्शनमा यो रूपान्तरणकारी अभियानको वैचारिक खाका तयार पारिएको हो। उनको देशव्यापी नेतृत्वले गर्दा नेपाली प्रविधि क्षेत्र चलायमान बनेको र डिजिटल रूपान्तरण प्रादेशिक बहसबाट उठेर राष्ट्रिय एजेन्डा बन्न सफल भएको उद्योगीहरूको भनाइ छ। विज्ञहरूका अनुसार संघीय संरचनामा दिगो आर्थिक विकासका लागि स्थानीय स्तरमै डिजिटल पूर्वाधारको मापदण्ड तोक्नु अपरिहार्य भइसकेको छ ।
यसै राष्ट्रिय अभियानलाई आत्मसात् गर्दै क्यान महासंघ गण्डकी प्रदेशका अध्यक्ष गुणनिधि पाण्डेले ’डिजिटल गण्डकी’ को अवधारणा यस क्षेत्रको विकासका लागि बलियो खम्बा भएको बताए । प्रादेशिक सामाजिक–आर्थिक लक्ष्यहरूलाई आधुनिक प्रविधिसँग जोड्न सके गण्डकी प्रदेशलाई नेपालकै अग्रणी डिजिटल हबका रूपमा विकास गर्न सकिने पाण्डेको भनाइ छ ।

डिजिटल गण्डकी संवादका तीन मुख्य स्तम्भ 
यस वर्षको संवाद मुख्य गरी तीनवटा रणनीतिक र भविष्यमुखी एजेन्डाहरूमा केन्द्रित रहनेछ, जसले नेपाली प्रविधि जगत्लाई नयाँ दिशा दिने अपेक्षा गरिएको छः

बजेट २०८३/८४ र आईटी रोडम्यापः कार्यक्रममा आगामी आर्थिक वर्षको बजेट विनियोजन र यसले राष्ट्रिय डिजिटल रूपान्तरणको लक्ष्यलाई कसरी सघाउँछ भन्नेबारे मसिनो विश्लेषण हुनेछ। सरोकारवालाहरूले नीतिगत प्राथमिकता, आईटी स्टार्टअपका लागि वित्तीय प्रोत्साहन, र परम्परागत सरकारी सेवालाई नागरिकमैत्री डिजिटल एप्लिकेसनमा रूपान्तरण गर्ने रोडम्यापबारे छलफल गर्नेछन् ।

नेपालका लागि सभरेन एआई डाटा सुरक्षा र एआई सुशासन विश्वव्यापी मुद्दा बनिरहेका बेला नेपालमा ’सभरेन एआई’ (सार्वभौम आर्टिफिसियल इन्टेलिजेन्स) को ढाँचाबारे बहस हुनेछ। राष्ट्रिय डाटाको सुरक्षा, नेपाली भाषामै आधारित ’लार्ज ल्याङ्ग्वेज मोडल’ को विकास, र वैदेशिक प्रविधिमाथिको निर्भरता कम गर्दै डिजिटल आत्मनिर्भरता हासिल गर्ने विषयमा केन्द्रित रहेर छलफल चलाइनेछ ।

आईसीटीमा सार्वजनिक–निजी साझेदारी (पिपिपि)
डिजिटल इकोसिस्टमको विस्तारका लागि सहकार्य अनिवार्य छ। कार्यक्रमले आईटी क्षेत्रका लागि उपयुक्त सार्वजनिक–निजी साझेदारी (एएए) मोडेलको मूल्याङ्कन गर्नेछ। यस अन्तर्गत स्थानीय तह, प्रदेश सरकार र निजी आईटी कम्पनीहरूबीच कसरी सहकार्य गरेर हाइ–स्पीड इन्टरनेट, डाटा सेन्टर र डिजिटल साक्षरता अभियानलाई गाउँ–गाउँसम्म पु¥याउन सकिन्छ भन्नेबारे वहस हुनेछ ।

“रणनीतिक खाकाहरूले हामीलाई दिशा त दिन्छन्, तर स्थानीय स्तरमा आईटीको सही कार्यान्वयन र सटिक कार्यसम्पादन नै सफलताको असली साँचो हो। हामीले यी डिजिटल नीतिहरू कास्की र समग्र गण्डकीका व्यवसायी, विद्यार्थी र स्थानीय तहका लागि व्यावहारिक र पहुँचयोग्य उपकरणमा परिणत हुने कुरा सुनिश्चित गर्नुपर्छ।“
पुरुषोत्तम कुँवर, अध्यक्ष, क्यान महासंघ कास्की

यस ’डिजिटल गण्डकी संवाद’ बाट प्राप्त हुने निष्कर्ष, श्वेतपत्र र प्रस्तावहरूले गण्डकी प्रदेशको आधिकारिक डिजिटल रूपान्तरणको मार्गचित्र तयार पार्न जगको काम गर्ने आयोजकले दृढ विश्वास लिएका छन्। यसले समग्र नेपाली नागरिकका लागि एउटा सुरक्षित, सहकार्यमूलक र फस्टाउँदो प्रविधिमैत्री वातावरण निर्माण गर्नेछ ।