हामी सबैकाे संसारन्यूज

काठमाडौं । गरिमा विकास बैंक लाई प्रतिष्ठित अन्तर्राष्ट्रिय अवार्ड “Best Managed Implementation Bank 2025” बाट सम्मानित गरिएको छ । बैंकले प्रविधिमैत्री बैंकिङ सेवा, संस्थागत सुशासन, ग्राहक केन्द्रित सेवा विस्तार तथा डिजिटल रूपान्तरणमा हासिल गरेको उत्कृष्ट उपलब्धिका आधारमा उक्त सम्मान प्राप्त गरेको हो ।

उक्त अवार्ड एक विशेष समारोहबीच प्रदान गरिएको थियो । कार्यक्रममा विभिन्न बैंक तथा वित्तीय संस्थाका प्रतिनिधि, उद्योगी–व्यवसायी, नियामक निकायका पदाधिकारी तथा बैंकका उच्च व्यवस्थापन तहका अधिकारीहरूको उल्लेखनीय उपस्थिति रहेको थियो । बैंकका तर्फबाट सञ्चालक समिति तथा व्यवस्थापन समूहले उक्त अवार्ड ग्रहण गरेका थिए ।

अर्थमन्त्री डा. स्वर्णिम वाग्लेको प्रमुख आतिथ्यतामा आयोजित अवार्ड वितरण समारोहमा आयोजकको तर्फबाट विकास बैंकलाई उक्त अवार्ड हस्तान्तरण गरिएको हो ।

अवार्ड वितरण समारोहमा बोल्दै बैंकका अध्यक्ष तथा प्रमुख कार्यकारी अधिकृतले यो सम्मान सम्पूर्ण ग्राहक, कर्मचारी, शेयरधनी र शुभेच्छुकहरूको विश्वास तथा सहयोगको परिणाम भएको बताए । उनीहरूले आगामी दिनमा अझ आधुनिक, सुरक्षित, छरितो तथा गुणस्तरीय बैंकिङ सेवा प्रवाह गर्दै ग्राहकको भरोसालाई थप मजबुत बनाउने प्रतिबद्धता व्यक्त गरे ।

बैंकले पछिल्लो समय डिजिटल बैंकिङ प्रणाली, मोबाइल बैंकिङ, क्यूआर भुक्तानी, अनलाइन सेवा विस्तार तथा ग्रामीण क्षेत्रसम्म वित्तीय पहुँच विस्तारमा उल्लेखनीय प्रगति गर्दै आएको छ । विशेषगरी लघु तथा साना उद्यमी, कृषि क्षेत्र तथा मध्यम वर्गीय ग्राहकलाई लक्षित सेवा तथा कर्जा योजनाले बैंकलाई बजारमा थप विश्वासिलो बनाएको बताइएको छ ।

यसअघि पनि गरिमा विकास बैंक ले विभिन्न राष्ट्रिय तथा अन्तर्राष्ट्रिय संस्थाबाट उत्कृष्ट बैंकिङ सेवा, मानव संसाधन व्यवस्थापन तथा नवप्रवर्तनात्मक वित्तीय सेवाका लागि सम्मान प्राप्त गरिसकेको छ । बैंकले भारतमा आयोजित ‘Emerging Asia Banking Awards’ मा “The Best Bank – Best AI/ML Implementation” विधामा उत्कृष्टता हासिल गर्नुका साथै “Best MSME Accelerator” विधामा रनर–अप बन्न सफल भएको थियो । त्यसैगरी, नेपालमै आयोजित “HRM Awards for Corporate Excellence 2024” बाट पनि बैंक सम्मानित भएको थियो ।

हाल गरिमा विकास बैंक ले देशभर फैलिएका आफ्ना शाखा सञ्जाल, एटीएम तथा डिजिटल माध्यममार्फत लाखौं ग्राहकलाई आधुनिक बैंकिङ सेवा प्रदान गर्दै आएको छ । बैंकले वित्तीय समावेशिता, प्रविधिमैत्री सेवा तथा ग्राहक सन्तुष्टिलाई केन्द्रमा राखेर आफ्नो सेवा विस्तारलाई तीव्रता दिएको जनाएको छ ।