हामी सबैकाे संसारन्यूज

काठमाडौँ । एन आई सी एशिया बैंक लिमिटेडले लिलाम बिक्री सम्बन्धी विस्तृत जानकारी गराउने उद्देश्यले एक अनलाईन पोर्टल सार्वजनिक गरेको छ ।

बैंकको नाममा रहेका बैंकिङ्ग, गैर–बैंकिङ्ग तथा धितो सुरक्षणमा रहेका सम्पत्तिहरूको लिलाम बिक्री प्रक्रियालाई थप सहज र पारदर्शी बनाउनको लागि बैंकले पोर्टल सार्वजनिक गरेको हो ।

बैंकले सञ्चालनमा ल्याएको यस पोर्टल मार्फत ग्राहकहरूले लिलाम हुन लागेका सम्पत्तिहरूको बारेमा विस्तृत विवरणहरू सो पोर्टल मार्फत थाहा पाउन सक्ने छन् ।

लिलाम बिक्री सम्बन्धी बैंकद्वारा प्रकाशित सूचनामा रहेको क्युआर कोड स्क्यान गरेर वा बैंकको आधिकारिक पोर्टल https://auctionassistance.nicasiabank.com  भित्र प्रवेश गरेर इच्छुक खरिदकर्ताहरूले सम्पत्तिको कित्ता नम्बर र क्षेत्रफल मात्र नभई उक्त सम्पत्तिको फोटो, नक्सा र स्थान पहिचानका लागि गुगल म्याप समेत हेर्न सक्ने व्यवस्था मिलाइएको छ । यस प्रविधिले गर्दा ग्राहकहरूले आफूले खरिद गर्न चाहेको सम्पत्तिको बारेमा घरमै बसेर यथेष्ट जानकारी लिन सक्नेछन् ।

यसका साथै, कुनै सम्पत्तिका बारेमा थप बुझ्न आवश्यक भएमा पोर्टलमा उपलब्ध म्यासेज बक्समा आफ्नो नाम, इमेल र मोबाइल नम्बर राखी बैंकलाई सिधै सम्पर्क गर्न सकिने सुविधा समेत उपलब्ध छ। बैंकले यस पोर्टलमा नियमित रूपमा लिलाम हुने सम्पत्तिहरूको सूचना अपडेट गर्ने जनाउँदै इच्छुक ग्राहकहरूलाई यस डिजिटल सुविधाको प्रयोग गरी लाभ लिन सकिन्छ । यस सुरुवातले बैंकको लिलाम प्रक्रियालाई थप व्यवस्थित र ग्राहकमुखी बनाउने विश्वास गरिएको छ।