हामी सबैकाे संसारन्यूज

काठमाडौं । लागुऔषध नियन्त्रण ब्युरोको टोलीले ललितपुरमा कारको टायरमा गोली प्रहार गरी २० हजार क्याप्सुल ट्रामाडोलसहित तीन जनालाई पक्राउ गरेको छ।

पक्राउ पर्नेमा बाराको सिम्रौनगढ नगरपालिका–३ निवासी ३५ वर्षीय जितेन्द्र पासवान तथा भारतीय नागरिक ३२ वर्षीय अहमद लड्न र ३३ वर्षीय महमद सद्दाम रहेका छन्।

ब्युरोका अनुसार बाराको सिम्रौनगढबाट काठमाडौंतर्फ आउँदै गरेको बागमती प्रदेश बीएडी ९२०१ नम्बरको रातो कारमा ठूलो परिमाणमा लागुऔषध ल्याइँदै गरेको सूचनापछि टोलीले कारको निगरानी तथा पिछा गरेको थियो। उक्त कारसँगै बा ५२ प ४५६७ नम्बरको मोटरसाइकल पनि रहेको प्रहरीले जनाएको छ।

प्रहरीले कार रोक्न खोज्दा चालकले भाग्ने प्रयास गरेपछि नियन्त्रणमा लिन कारको दायाँ टायरमा एक राउण्ड गोली प्रहार गरिएको लागुऔषध नियन्त्रण ब्युरोका एसपी तथा प्रवक्ता दुर्गाराज रेग्मीले जानकारी दिए।

कार नियन्त्रणमा लिएर गरिएको खानतलासीका क्रममा २० हजार क्याप्सुल ट्रामाडोल तथा पाँच थान मोबाइल फोन बरामद गरिएको प्रहरीले जनाएको छ।

घटनाबारे थप अनुसन्धान भइरहेको प्रहरीले बताएको छ।