हामी सबैकाे संसारन्यूज

काठमाडौँ । चालू आर्थिक वर्ष २०८२/८३ को ११ महिना (साउन–जेठ) मा नेपालको कुल वैदेशिक व्यापारमा वृद्धि भएको छ । गत आर्थिक वर्षको सोही अवधिको तुलनामा कुल वैदेशिक व्यापार १४.७८ प्रतिशतले बढेर २१ खर्ब ७२ अर्ब ६ करोड रुपैयाँ पुगेको हो । गत वर्षको ११ महिनामा यस्तो व्यापार १८ खर्ब ९२ अर्ब ३६ करोड रुपैयाँ बराबरको थियो ।

वैदेशिक व्यापारको आकार बढेसँगै देशको व्यापार घाटामा पनि १५.६७ प्रतिशतको उच्च वृद्धि देखिएको छ । चालू आर्थिक वर्षको जेठ मसान्तसम्ममा मात्रै नेपालले १६ खर्ब १६ अर्ब १३ करोड रुपैयाँ व्यापार घाटा ब्यहोरेको छ ।

आयात र निर्यात दुवैमा वृद्धि

भन्सार विभागले सार्बजनिक गरेको तथ्यांक अनुसार चालू आर्थिक वर्षको ११ महिनामा आयात १५.१६ प्रतिशतले बढेर १८ खर्ब ९४ अर्ब ९ करोड रुपैयाँ पुगेको छ । गत वर्ष सोही अवधिमा १६ खर्ब ४४ अर्ब ७९ करोड रुपैयाँको आयात भएको थियो ।

त्यस्तै, यस अवधिमा निर्याततर्फ पनि केही सुधार देखिएको छ । गत वर्ष २ खर्ब ४७ अर्ब ५७ करोड रुपैयाँ बराबरको निर्यात भएकोमा यस वर्ष १२.२८ प्रतिशतले वृद्धि भई २ खर्ब ७७ अर्ब ९६ करोड रुपैयाँ पुगेको छ । निर्यात बढे तापनि आयातको विशाल आकारका कारण व्यापार घाटा नियन्त्रण बाहिर देखिएको हो ।

आयात–निर्यात अनुपात अझै प्रतिकूल

तथ्यांक अनुसार नेपालको आयात र निर्यातको खाडल अझै गहिरिँदै गएको छ । गत वर्ष १ रुपैयाँ बराबरको वस्तु निर्यात गर्दा ६.६४ रुपैयाँको सामान आयात हुने गरेकोमा यस वर्ष आयात÷निर्यात अनुपात २.५६ प्रतिशतले बढेर ६.८१ पुगेको छ।

कुल वैदेशिक व्यापारमा निर्यातको हिस्सा पनि गत वर्षको १३.०८ प्रतिशतबाट घटेर १२.८० प्रतिशतमा खुम्चिएको छ भने आयातको हिस्सा ८६.९२ प्रतिशतबाट सामान्य बढेर ८७.२० प्रतिशत पुगेको छ । यसले नेपाली अर्थतन्त्रमा परनिर्भरता अझै बढ्दै गएको संकेत गर्दछ ।