हामी सबैकाे संसारन्यूज

काठमाडाैँ । नेपाल टेलिकमले प्रिपेड मोबाइल प्रयोगकर्ताहरूका लागि मासिक रूपमा स्वतः नवीकरण हुने सब्स्क्रिप्सन–आधारित मोडेल अन्तर्गत विभिन्न नयाँ प्याकेजहरू सञ्चालनमा ल्याएको छ। यस व्यवस्थापछि सेवाग्राहीले प्रत्येक महिना पुनः प्याकेज सक्रिय गर्नुपर्ने झन्झटबाट छुटकारा पाउनेछन्। एकपटक प्याकेज सक्रिय गरेपछि ग्राहकको मोबाइल ब्यालेन्स पर्याप्त भएमा प्रत्येक महिनामा उक्त प्याकेज स्वतः नवीकरण हुने व्यवस्था गरिएको कम्पनीले जनाएको छ।

कम्पनीले ३० दिन अवधिका तीन प्रकारका प्याकेज उपलब्ध गराएको छ। रु. २९९ को ‘नमस्ते रिकरिङ २९९’ प्याकेजमा सबै नेटवर्कमा प्रयोग गर्न मिल्ने ३०० मिनेट अल–नेट भ्वाइस, ४ जीबी नियमित डाटा, राति ११ बजेदेखि बिहान ६ बजेसम्म प्रयोग गर्न मिल्ने २ जीबी नाइट डाटा तथा नेपाल टेलिकम नेटवर्कभित्र मात्र प्रयोग गर्न सकिने २० वटा अन–नेट एसएमएस सुविधा उपलब्ध हुनेछ।

त्यसैगरी रु. ४९९ को ‘नमस्ते रिकरिङ ४९९’ प्याकेजमा ५०० मिनेट अल–नेट भ्वाइस, ८ जीबी नियमित डाटा, राति प्रयोग गर्न मिल्ने ४ जीबी नाइट डाटा तथा सबै नेटवर्कमा पठाउन सकिने १०० वटा एसएमएस सुविधा समावेश गरिएको छ।

रु. ७९९ को ‘नमस्ते रिकरिङ ७९९’ प्याकेजमा भने सबै नेटवर्कमा असीमित कल सुविधा, दैनिक १० जीबीका दरले मासिक ३०० जीबी डाटा तथा ३०० वटा अल–नेट एसएमएस उपलब्ध हुने व्यवस्था गरिएको छ।

यसका साथै सब्स्क्रिप्सनमा आधारित यी प्याकेज प्रयोग गर्ने ग्राहकका लागि आवश्यकताअनुसार एड–अन डाटा प्याक पनि उपलब्ध गराइनेछ। यसअन्तर्गत रु. ३० मा १ दिनका लागि १ जीबी, रु. ५० मा ३ दिनका लागि २ जीबी र रु. ९९ मा ७ दिनका लागि ४ जीबी डाटा लिन सकिनेछ।

ग्राहकले *1416# डायल गरी प्राप्त निर्देशनअनुसार यी प्याकेजहरू खरिद गर्न सक्ने कम्पनीले जनाएको छ।