हामी सबैकाे संसारन्यूज

काठमाडौं। सुनसरीमा आइतबार राति भएको हिंसात्मक घटनापछि गृह मन्त्रालयले सुनसरीका प्रमुख जिल्ला अधिकारी (सिडिओ) बासुदेव घिमिरे लाई गृह मन्त्रालय तानेको छ। उनको स्थानमा संखुवासभाका प्रमुख जिल्ला अधिकारी ईश्वरीप्रसाद अर्याल लाई सुनसरीको जिम्मेवारी दिइएको छ।

सुनसरीको देवानगञ्ज गाउँपालिका–३, कप्तानगञ्ज क्षेत्रमा दुई पक्षबीच भएको झडपका क्रममा एक जनाको मृत्यु हुनुका साथै २४ जना घाइते भएपछि गृह मन्त्रालयले जिल्लाको सुरक्षा नेतृत्वमा व्यापक हेरफेर गरेको हो। घाइतेमध्ये नौ जना सर्वसाधारण, १० जना नेपाल प्रहरी र पाँच जना सशस्त्र प्रहरीका जवान रहेका छन्।

घटनापछि मन्त्रालयले कोशी प्रदेश प्रहरी प्रमुख डीआईजी बिनोद घिमिरेलाई पनि प्रहरी प्रधान कार्यालय तानेर उनको स्थानमा डीआईजी शेखर खनाललाई पठाएको छ। यस्तै, सुनसरी प्रहरी प्रमुख एसपी केशव थेबेलाई भैरहवास्थित गौतमबुद्ध अन्तर्राष्ट्रिय विमानस्थल सरुवा गरिएको छ भने उनको स्थानमा एसपी पुष्पराज मल्ललाई खटाइएको छ। सशस्त्र प्रहरीतर्फ पनि जिल्लाको नेतृत्व परिवर्तन गरिएको छ।

घटनाको छानबिन गर्न गृह मन्त्रालयले सहसचिव भूपेन्द्र थापाको संयोजकत्वमा पाँच सदस्यीय समिति गठन गरेको छ। समितिलाई एक साताभित्र घटनाको सत्यतथ्य छानबिन गरी प्रतिवेदन पेश गर्न तथा भविष्यमा यस्ता घटना दोहोरिन नदिन आवश्यक सुझाव दिन जिम्मेवारी दिइएको छ।

घटनापछि थप तनाव फैलिन नदिन देवानगञ्ज र हरिनगर गाउँपालिकाका केही क्षेत्रमा जिल्ला प्रशासन कार्यालयले अनिश्चितकालीन कर्फ्यु आदेश जारी गरेको छ।