हामी सबैकाे संसारन्यूज

काठमाडौं। वीरगञ्जस्थित नारायणी अस्पतालमा चिकित्सकमाथि भएको आक्रमणको विरोधमा नेपाल चिकित्सक संघ (एनएमए) को आह्वानमा आज देशभरका सरकारी तथा निजी अस्पतालमा ओपीडी स्वास्थ्य सेवा बन्द गरिएको छ।

नारायणी अस्पतालमा वीरगञ्जमा डा. प्रमोद राममाथि कुटपिट भएको घटनाको विरोधमा आज चिकित्सक तथा स्वास्थ्यकर्मीहरु आन्दोलनमा छन् । उनीहरुले देशभर आकस्मिक बाहेकको सेवा बन्द गरेका छन् ।

संघको आन्दोलनका कारण नियमित बहिरङ्ग (ओपीडी) सेवा, फलोअप, विशेषज्ञ परामर्श तथा अन्य गैरआकस्मिक स्वास्थ्य सेवाहरू प्रभावित भएका छन्। यद्यपि आकस्मिक (इमर्जेन्सी) सेवा, सघन उपचार कक्ष (आईसीयू), भर्ना भएका बिरामीको उपचार, प्रसूति तथा अन्य जीवनरक्षक सेवाहरू भने नियमित रूपमा सञ्चालन भइरहेको अस्पतालहरूले जनाएका छन्।

नेपाल चिकित्सक संघले नारायणी अस्पतालमा कार्यरत चिकित्सकमाथि भएको आक्रमणको भर्त्सना गर्दै दोषीमाथि तत्काल कडा कानुनी कारबाही गर्न र स्वास्थ्यकर्मी तथा स्वास्थ्य संस्थाको सुरक्षा सुनिश्चित गर्न सरकारसँग माग गरेको छ।

संघले उपचारका क्रममा हुने विवादलाई हिंसात्मक बनाउने प्रवृत्ति अस्वीकार्य रहेको उल्लेख गर्दै चिकित्सक तथा स्वास्थ्यकर्मीले सुरक्षित वातावरणमा काम गर्न पाउनुपर्नेमा जोड दिएको छ। आफ्ना माग पूरा नभएसम्म आन्दोलनका थप कार्यक्रम सार्वजनिक गरिने चेतावनी पनि संघले दिएको छ।

उता, आन्दोलनका कारण नियमित स्वास्थ्य सेवा प्रभावित भएपछि उपचारका लागि अस्पताल पुगेका बिरामीहरू मर्कामा परेका छन्। सरकारले घटनाको छानबिन गरी दोषीलाई कानुनी दायरामा ल्याउने प्रक्रिया अघि बढाएको जनाएको छ।