हामी सबैकाे संसारन्यूज

काठमाडौं । रसुवाको भोटेकोशी नदीमा आएको भीषण बाढीबाट प्रभावित नागरिक, व्यवसायी, श्रमिक तथा सुरक्षाकर्मीप्रति नेपाल अटोमोबाइल्स एसोसिएसन (नाडा)ले गहिरो दुःख व्यक्त गरेको छ।

नाडाले बेपत्ता तथा प्रभावित व्यक्तिहरूको तत्काल खोज, उद्धार र सुरक्षित स्थानान्तरणलाई प्राथमिकतामा राखेर काम गरिरहेको सरकारको प्रशंसा गर्दै विपद्को यस घडीमा आफू पनि सरकार र नागरिकको साथमा रहेको जनाएको छ।

रसुवा–केरुङ नाका नेपालको उत्तरी व्यापारिक तथा अटोमोबाइल आपूर्ति शृंखलाका लागि महत्वपूर्ण क्षेत्र भएकाले बाढीबाट यस क्षेत्रमा ठूलो क्षति पुगेको नाडाको भनाइ छ। नाडामा आबद्ध सदस्य तथा अटोमोबाइल व्यवसायीका सामान र सवारीसाधन भन्सार क्षेत्रमा रहेकाले त्यसको यकिन क्षतिको विवरण अझै प्राप्त भइनसकेको जनाएको छ।

सडक, पुल, भन्सार, व्यापारिक संरचना तथा अन्य पूर्वाधारमा पुगेको क्षतिले सवारीसाधन आयात तथा समग्र आपूर्ति व्यवस्थामा प्रत्यक्ष प्रभाव पार्न सक्ने भन्दै नाडाले सरकारसँग घटनाको तत्काल विस्तृत क्षति मूल्यांकन गर्न आग्रह गरेको छ।

नाडाले प्रभावित सडक तथा यातायात पूर्वाधारको यथाशीघ्र पुनःस्थापना गरी सुरक्षित आवागमनको वातावरण बनाउन तथा रसुवा–केरुङ नाकाबाट हुने व्यापारिक गतिविधिलाई प्राथमिकताका साथ सहज बनाउन सम्बन्धित निकायको ध्यानाकर्षण गराएको छ।

त्यस्तै, बाढीबाट सवारीसाधन, अटोमोबाइल व्यवसाय, भन्सार क्षेत्र तथा अन्य व्यापारिक सम्पत्तिमा भएको क्षतिको यथार्थ विवरण संकलन गरी प्रभावित व्यवसायीलाई आवश्यक सहजीकरण गर्न नाडाले सरकारसँग अनुरोध गरेको छ।

क्षतिग्रस्त सवारीसाधनको पहिचान तथा मूल्यांकन, बीमा दाबी र भन्सारसम्बन्धी प्रक्रियालाई विपद्को विशेष परिस्थितिलाई ध्यानमा राख्दै सरल, सहज र छिटो बनाउनुपर्ने नाडाको धारणा छ।

विपद्को कठिन घडीमा सरकार, सुरक्षा निकाय, स्थानीय तह, व्यवसायी तथा सम्बन्धित सबै पक्षबीच प्रभावकारी समन्वय र सहकार्य आवश्यक रहेको नाडाले जनाएको छ। प्रभावित क्षेत्रमा राहत तथा उद्धार कार्यलाई प्रभावकारी बनाउन निजी क्षेत्रका तर्फबाट आवश्यक सहयोग र सहकार्य गर्न नाडा तयार रहेको समेत जनाएको छ।

नाडाले प्राकृतिक विपत्तिबाट प्रभावित सम्पूर्ण नागरिक तथा व्यवसायीको शीघ्र उद्धार, राहत र पुनःस्थापनाको काम प्रभावकारी रूपमा अघि बढ्ने विश्वास व्यक्त गरेको छ।