हामी सबैकाे संसारन्यूज

काठमाडौं। विद्यालयस्तरीय खेलकुद प्रतियोगितामध्ये पुरानो तथा लोकप्रिय स.बल ज्ञान कार्निभलको ३२औँ संस्करण सोमबारदेखि सुरु हुने भएको छ।

प्रतियोगिताअन्तर्गत ब्वाइज तथा गल्र्स बास्केटबलसँगै ब्वाइज र गल्र्स फुटबल प्रतियोगिता सञ्चालन हुने आयोजक ज्ञानोदय बाल वाटिकाकी संस्थापक प्रिन्सिपल इन्दिरा याक्थुम्बाले शुक्रबार आयोजित पत्रकार सम्मेलनमा जानकारी दिइन्।

महिला फुटबललाई प्रोत्साहन गर्ने उद्देश्यले यस वर्ष पहिलोपटक गल्र्स फुटबल समावेश गरिएको ज्ञानोदयका सिनियर भाइस प्रिन्सिपल भानु एले बताए।

स.बलको मुख्य प्रायोजन तथा सफल दूध र फन पार्टनर चोकोफन क्रसको सह–प्रायोजनमा हुने प्रतियोगिताको बास्केटबलतर्फ ब्वाइज र गल्र्समा समान ८–८ टोलीले लिग कम नकआउट आधारमा प्रतिस्पर्धा गर्नेछन्। ब्वाइज फुटबलमा सहभागी ९ टोलीलाई दुई समूहमा विभाजन गरी लिग कम नकआउट आधारमा खेलाइनेछ।

गल्र्स फुटबल भने सुपर लिग प्रणालीमा सञ्चालन हुनेछ। जसमा ७ टोली सहभागी हुनेछन्। सुपर लिगको शीर्ष दुई स्थानमा रहने टोलीले उपाधिका लागि पुनः प्रतिस्पर्धा गर्ने आयोजकले जनाएको छ।

स.बल फाउन्डेसनका अध्यक्ष सतिश जोशीले विद्यालयस्तरमा स्थापित र लोकप्रिय प्रतियोगिता ज्ञान कार्निभलसँग जोडिन पाउनु गर्वको विषय भएको बताए।

यसैबीच, भोटेकोशी नदीमा आएको विनाशकारी बाढीका कारण देश शोकमा रहेकाले प्रतियोगिताको उद्घाटन कार्यक्रमलाई सामान्य बनाइने आयोजकले जनाएको छ।

दसदिने प्रतियोगिताका सम्पूर्ण खेल बुङमतीस्थित ज्ञानोदय बाल वाटिकाको खेलमैदानमा सञ्चालन हुनेछन्। सन् १९९४ देखि आयोजना हुँदै आएको ज्ञान कार्निभल विद्यालयस्तरीय खेलकुदको लामो इतिहास बोकेको प्रतियोगिता हो।