हामी सबैकाे संसारन्यूज

२१ असोज, काठमाडौँ । चाडबाड नजिकिँदै जाँदा राजधानीमा खाने तेल, मैदा, चिनी, दूध, तरकारीलगायतको मूल्य अचाक्ली बढेको छ ।
सरकारले महँगी रोक्ने संयन्त्र बनाएर बजार व्यवस्थित गर्न नसक्दा व्यवसायीले मनपरी ढंगले मूल्य बढाएका हुन् ।

खाने तेल र मैदा १५ रुपैयाँसम्म मूल्य बढेको छ। तरकारी पोहोरको तुलनामा एक सय ७१ प्रतिशतसम्म महँगिएको छ। इन्धन मूल्यवृद्धिले ढुवानी भाडा बढ्दा उपभोग्य वस्तुमा त्यसको असर परेको छ ।

उपभोक्ता अधिकारकर्मी भने सरकारले अत्यावश्यक वस्तुको मूल्य तोकेर नियमन नगर्दा बजारमा मनपरीतन्त्र मौलाएर उपभोक्ता ठगिएको बताउँछन्।

राजधानीमा तोरी र भटमासको तेल लिटरमा १०–१० रुपैयाँ महँगिएको छ। सूर्यमुखी लिटरमा १५ रुपैयाँ बढेको छ । त्यसैगरी, मैदा १० रुपैयाँ महँगिएको छ भने ५९ रुपैयाँसम्म ओर्लेको चिनीको भाउ ८५ रुपैयाँ पुगेपछि संसद्को सार्वजनिक लेखा समितिले तत्काल मूल्य घटाउन निर्देशन दिएको छ । नागरिक दैनिकमा समाचार छ ।