हामी सबैकाे संसारन्यूज

२८ असोज, काठमाडौं । फिनल्याण्डलाई कर्मथलो बनाउँदै आएका गैरआवासीय नेपाली बुद्धिजीवी जगन्नाथ काफ्लेद्धारा लिखित ‘समृद्ध नेपालको मार्गचित्र’ विमोचित भएको छ ।

गैरआवासीय नेपाली संघको प्रथम विश्व विज्ञसम्मेलनको अवसरमा आयोजित ‘ विकासका नीतिका लागि प्रवासी नेपालीहरु’ नामक चौथो प्लेनरी सेसनमा सो पुस्तक विमोचन भएको हो । सोहि सेसनमा ‘ग्लोबल नेप्लीज’ नामक पुस्तक समेत विमोचन गरिएको थियो ।

कार्यक्रमका प्रमुख वक्ता परराष्ट्रमन्त्री प्रदीप ज्ञवालीले देशले आर्थिक कुटनीतिको मिसन समातिसकेको हुँदा लगानी प्रर्बद्धन, व्यापार, प्रवासी नेपालीको हित र पर्यटनलाई विशेष जोड दिएर हातेमालो गर्न गैरआवासीय बुद्धिजीवीमा आव्हान गरेका थिए ।

डा. भेष बहादुर थापाको सभापतित्व र खगेन्द्र ढकालको संचालनमा रहेको सो कार्यक्रममा राष्ट्रिय योजना आयोगका उपाध्यक्ष डा. पुष्पराज कंडेल, म्यानमारका लागि नेपाली राजदूत भीम उदास, एनपिआईका प्रतिनिधि शरद पौडेल, युनिभर्सिटी अफ अक्सफोर्डका कृष्ण अधिकारी र प्रोफेसर युवराज पोखरेलले विषयगत अवधारणा राखेका थिए भने एनआरएनए अध्यक्ष भवन भट्ट, अर्थविज्ञ मदन दाहाल र नेपाल बैदेशिक रोजगार मामिला तथा नेपाली पोलिसी इन्स्च्यिुटकी विज्ञ शरु जोशी श्रेष्ठले अबधारणामाथि टिप्पणी गरेका थिए ।

विभिन्न ३० वटा शीर्षकबाट समृद्धिको आधार बनाउन सकिने व्यवहारिक बाटोसहित सरल अभ्यास कोरिएको ‘समृद्ध नेपालको मार्गचित्र’ ऐक्यबद्धता प्रकाशन नेपालले प्रकाशित गरेको हो ।