हामी सबैकाे संसारन्यूज

२४ फागुन, काठमाडौँ । घुस प्रकरणमा मुछिएपछि पदबाट राजीनामा दिएका अख्तियार दुरुपयोग अनुसन्धान आयोगका पूर्वआयुक्त राजनारायण पाठकलाई विदेश जान प्रतिबन्ध लगाइएको छ ।

चाँगुनारायणस्थित नेपाल इन्जिनियरिङ कलेजको स्वामित्व विवादलाई मिलाइदिने भन्दै घुस लिएको भिडियो सार्वजनिक भएपछि उनले पदबाट राजीनामा दिएका थिए । पाठकले विवाद मिलाउने भन्दै पटक पटक गरी ७८ लाख घुस लिएको भिडियो सार्वजनिक भएपछि अख्तियारले उनी विरुद्ध छानविन सुरु गरेको थियो । पाठक अहिले छानबिनकै क्रममा रहेको अख्तियारका प्रवक्ता रामेश्वर दंगाल बताउँछन् । ‘उहामाथि छानविन भइरहेको छ,’ दंगालले भने ।

घुस प्रकरणमा फसेका पाठक सम्भावित कारवाहीबाट बच्न विदेश जानसक्ने भन्दै विदेश जान प्रतिबन्ध लगाइएको हो । ‘उनी विदेश भाग्न नसकुुन भनेर अध्यागमन विभाग र विमानस्थल प्रहरीलाई उनको निगरानीमा राख्न निर्देशन दिइएको छ,’ स्रोतले भन्यो । आजको नागरिक दैनिकले समाचार छापेको छ ।