हामी सबैकाे संसारन्यूज

१२ चैत, काठमाडौं । सरकारको आयोजनामा चैत १५ र १६ गते  हुन लागेको लगानी सम्मेलनका दिन नेत्रविक्रम चन्द विप्लव नेतृत्वको नेपाल कम्युनिष्ट पार्टी नेकपाले नेपाल बन्द गर्ने भएको छ ।

लगानी सम्मेलनका लागि विप्लव समूह बाधक भएको भन्दै सरकारले देशभरीबाट विप्लवका नेता तथा कार्यकर्ताहरुलाई पक्राउ गरिरहेका बेला विप्लव समूहले १५ गते बेलुका मशाल जुलुस र १६ गते शनिबारको दिन देशभरी आम हड्ताल सहित नेपाल बन्दको कार्यक्रम राखेको सोमबार जारी विज्ञप्तिमार्फत् जनाएको छ ।

हालै पक्राउ परेका स्थायी समिति सदस्य हेमन्त प्रकाश वलीलगायतका नेताहरुको रिहाइको माग गर्दै स्थायी समितिको निर्णय अनुसार १६ गते देशव्यापी बन्दको आव्हान गरेको उक्त समूहले बताएको छ ।

उक्त समूहले १३ गते देशभर चोक जुलुस, १४ गते देशभर कोणसभा, १५ गते मशाल जुलुस, १६ गते नेपाल बन्द चैत १९ गते देशभर अन्तरक्रिया, चैत २१ गते जनवर्गिय संगठनको विरोध प्रदर्शन, चैत २२ र २३ गते कालो झण्डा प्रदर्शन, चैत २४ गते देश व्यापी जनप्रदर्शन र जनशभा गर्ने जनाएको छ ।

उक्त समूहले एसइइ परीक्षा दिइरहेका विद्यार्थीलाई असहज नहोस् भनेर चैत १६ गते शनिबार देशव्यापी बन्दको आव्हान गरेको जनाएको छ ।

त्यसैगरी चैतभरीमा आफ्नो समूहमाथिको प्रतिबन्ध नहटाएमा केपी ओली सरकारका कार्यक्रम विरुद्ध प्रतिबन्ध र आम हड्तालको तयारी गरिने पनि सो विज्ञप्तिमा बताइएको छ ।