Sansar News
२१ चैत, टीकापुर । कैलालीको टीकापुर नगरपालिका ७ सत्तीस्थित कर्णाली नदीमा तटबन्ध अलपत्र पार्ने निर्माण कम्पनीलाई कालोसुचीमा राख्न स्थानीयले माग गरेका छन् ।
राष्ट्रिय गौरवको रानी, जमरा, कुलरिया कुला सिँचाइ आयोजनासँग तटबन्ध निर्माणका लागि सम्झौता गरेको हाइग्रिभा सिद्धी शाही प्रकाश जेभीलाई कालोसूचीमा राख्न स्थानीयले माग गरेका हुन् ।
आयोजनासँग निर्माण कम्पनीले ०७२ चैत १३ गते सम्झौता गरेको थियो । सम्झौता भएको एक वर्षभित्रै निर्माण गरिसक्नुपर्ने भए पनि निर्माण कम्पनीले आलटाल गर्दै आएको भन्दै स्थानीयले कालोसूचीमा राख्न माग गरेका हुन् ।
सत्ती कर्णाली सामुदायीक वनमा पर्ने कर्णाली नदीमा १ हजार ७ सय मिटर लामो तटबन्ध गर्ने गरी कम्पनीसँग सम्झौता भएको थियो ।
स्थानीयले दबाब दिएपछि गत वर्ष निर्माण कम्पनीले झन्डै ४ सय मिटर तटबन्ध गरेको थियो । बाँकी १ हजार ३ सय मिटर तटबन्ध गर्न निर्माण कम्पनीले आलटाल गर्दै आएको स्थानीयले आरोप लगाएका छन् । बिहीबारको अन्नपुर्ण पोस्ट दैनिकमा परमानन्द पाण्डेले लेखेका छन् ।
वि.सं.२०७५ चैत २१ बिहीवार ०७:४८ मा प्रकाशित
