Sansar News
२५ चैत, काठमाडौ । नेपाली कामदार जापान पठाउने सम्बन्धमा अन्तिम निर्णयका लागि नेपालले जापानका ४ मन्त्रालयसँग अनलाइन छलफल भिडियो कन्फरेन्स गर्ने तयारी गरेको छ । नेपाली श्रमिक जापान पठाउने सम्बन्धमा दुई देशबीच सहयोग समझदारी एमओसी लाई कार्यान्वयनको चरणमा लैजान छलफल हुन लागेको हो । छलफलको मिति तय भए नभए पनि नेपाल र जापानका प्राविधिक टोलीबीच यो हप्ताभित्रै छलफल गर्ने गरी यसका विषयवस्तु तयार गरिएका छन् ।
नेपाली श्रमिक लिने सम्बन्धमा कामदारसँग सरोकार राख्ने जापानका श्रम रोजगार मामला तथा परराष्ट्रलगायत मन्त्रालयसँग छलफल गर्नेगरी प्रश्नसिहितको मस्यौदा तयार गरिएको श्रम, रोजगार तथा सामाजिक सुरक्षा मन्त्रालयले जनाएको छ । सो छलफलमा जापान जाने नेपाली कामदारको सेवा सुविधा, लागत, पाठ्यक्रम, काम गर्ने क्षेत्रके प्राथमिकता र कानुनी हैसियतका बारेमा प्रश्नोत्तरसहित छलफल हुने मन्त्रालयले जनाएको छ । सोमबारको कारोबार दैनिकमा गोपाल संग्रौलाले लेखेका छन् ।
वि.सं.२०७५ चैत २५ सोमवार ०८:०४ मा प्रकाशित
