हामी सबैकाे संसारन्यूज

काठमाडाैँ । स्वास्थ्य तथा जनसंख्या मन्त्रालयद्वारा सञ्चालित Free Health Portal मार्फत देशभरका अस्पतालमा उपलब्ध निःशुल्क शय्याको विवरण सार्वजनिक गरिएको छ। डिजिटल माध्यमबाट सेवा पहुँचलाई सहज, पारदर्शी र प्रभावकारी बनाउने उद्देश्यले सुरु गरिएको यस पोर्टलले नागरिकलाई आवश्यक जानकारी एकै स्थानबाट प्राप्त गर्न सहयोग पुर्‍याइरहेको छ।

पोर्टलमा उपलब्ध तथ्याङ्कअनुसार हाल देशभर कुल ५,९८४ शैय्या रहेकोमा १० प्रतिशत अर्थात् ६०० शैय्या निःशुल्क उपचारका लागि छुट्याइएको छ। तीमध्ये हाल १ शैय्या मात्रै प्रयोगमा रहेको देखिएको छ भने ५९९ शय्या अझै उपलब्ध छन्। यसले तत्काल उपचार आवश्यक परेका बिरामीहरूका लागि पर्याप्त निःशुल्क सेवा उपलब्ध रहेको संकेत गर्दछ।

पोर्टलमा प्रदेश तथा संस्थाअनुसार विवरण हेर्न सकिने सुविधा रहेको छ। प्रयोगकर्ताले आफू नजिकको अस्पतालमा उपलब्ध निःशुल्क शय्या सजिलै पत्ता लगाउन सक्नेछन्। उदाहरणका लागि Seti Zonal Hospital मा ३२ शैय्या (तर सरकारी पाेर्टलमा त्रुटीपूर्ण ३२० छ) रहेको देखिन्छ भने Nobel Medical College, Kathmandu Medical College लगायतका संस्थाहरूमा पनि पर्याप्त शय्या खाली रहेको जानकारी पोर्टलमा समावेश गरिएको छ।

नेपालको संविधानले प्रत्येक नागरिकलाई आधारभूत स्वास्थ्य सेवा निःशुल्क प्राप्त गर्ने अधिकार सुनिश्चित गरेको छ। सोही प्रावधान कार्यान्वयन गर्न सरकारले विभिन्न स्वास्थ्य संस्थामार्फत निःशुल्क उपचार सेवा उपलब्ध गराउँदै आएको छ। यस पोर्टलले त्यस्ता सेवाको निगरानी र सूचना प्रवाहलाई थप व्यवस्थित बनाएको मन्त्रालयले जनाएको छ।

सरकारले डिजिटल प्रविधिको प्रयोगमार्फत स्वास्थ्य सेवा व्यवस्थापनलाई आधुनिक बनाउँदै लैजाने लक्ष्य राखेको छ। यस पोर्टलको प्रभावकारी प्रयोगले बिरामी तथा सेवाग्राहीलाई समयमै उपचार प्राप्त गर्न मद्दत पुग्ने अपेक्षा गरिएको छ।