हामी सबैकाे संसारन्यूज

काठमाडौं । बाढीबाट प्रभावित नागरिकलाई सहयोग गर्ने उद्देश्यले विद्यार्थी संगठन अखिल (क्रान्तिकारी)ले कपडा बैंक सञ्चालनमा ल्याएको छ। बाढीपीडितका लागि लगाउन योग्य तथा सफा कपडा दान गर्न सकिने व्यवस्था गरिएको छ।

तीन दिनसम्म काठमाडौंको तीनकुनेमा सञ्चालन हुने कपडा बैंकमा संकलन भएका कपडा बाढीपीडितलाई वितरण गरिने अखिल क्रान्तिकारीले जनाएको छ।

यसैबीच, बाढीका कारण घाइते भएका नागरिकको उपचारमा रगतको अभाव हुन नदिन वाईसीएल नेपालले आपत्कालीन रक्तदान कार्यक्रम गरेको छ।

वाईसीएल नेपालको केन्द्रीय कार्यालय पेरिसडाँडामा बिहिबार आयोजित रक्तदान कार्यक्रममा १७० जनाले रक्तदान गरेको वाईसीएलका केन्द्रीय सचिव धिरज उपरकोटीले जानकारी दिए।

बाढी प्रभावितको उद्धार, राहत तथा सहयोगका लागि वाईसीएल नेपालका ६०० स्वयंसेवक परिचालन गरिएको केन्द्रीय अध्यक्ष पुष्प ओलीले बताए।

उनका अनुसार जिल्ला प्रशासन, सुरक्षा निकाय तथा स्थानीय तहसँग समन्वय गरी रसुवा, नुवाकोट, धादिङ, गोरखा र चितवनलगायतका जिल्लामा वाईसीएलका स्वयंसेवक टोली परिचालन गरिएको छ।