हामी सबैकाे संसारन्यूज

२७ चैत, विराटनगर । सम्बन्ध विच्छेद गर्दा महिलाले श्रीमानको सम्पत्तिबाट आधा अंश पाउने कानुनी व्यवस्था छ । महिलाले अंश पाउने व्यवस्था कानुनले गरेको भए पनि धेरै महिलाले श्रीमान् बाट अंश लिने गरेका छैनन् ।

आइतबार जिल्ला अदालत मोरङमा ६ जोडिले सम्बन्ध बिच्छेद गरे । ती मध्ये चार जोडी मोरङ बेलबारी नगरपालिकाका मात्र थिए । सम्बन्ध विच्छेद गर्ने महिला कसैले पनि श्रीमान्बाट अंश लिएनन् । आइतबार जिल्ला अदालत मोरङको २ नम्बर इजलासमा न्यायाधिश पुर्णेश्वरप्रसाद उपाध्यायले सम्बन्ध विच्छेदको मिसिल हेरिरहेका थिए ।

सुनवाइका क्रममा न्यायाधिश उपाध्यायले हरेक जोडीलाई सोधे, ‘ के का लागि कागज लिएर आएको ?’ उनले फेरि सोधे, ‘अब के गर्ने?’ जवाफ आउथ्यो, ‘छुट्टिएर बस्ने ।’ सम्बन्ध बिच्छेद गर्दा अंश पाइन्छ भन्ने थाहा छ ?’ न्यायाधिश उपाध्यायको प्रश्न हुन्थ्यो । महिला भन्थे ‘थाहा छ तर नलिएको । त्यसमध्ये एक महिलाले भनिन्, ‘ छोरो बाबुसँगै बस्ने भयो त्यसकारण मैले अंश नलिने निर्णय गरे ।’