Sansar News
२८ कात्तिक, तिलोत्तमा (रुपन्देही) । सभामुख ओनसरी घर्तीले निलम्बित अख्तियार प्रमुख लोकमानसिंह कार्कीको महाभियोग प्रस्तावमा संसद्ले आलटाल नगर्ने बताउनुभएको छ ।
महाभियोग प्रस्ताव प्रक्रियामा गइसकेकाले त्यो निरन्तर अघि बढ्ने भएको र कसैले शङ्का गर्न नहुने बताउनुभयो । प्रेस सेन्टर रुपन्देहीले बुटवलमा आज गरेको पत्रकार सम्मेलनमा उहाँले कुनै कारणले महाअभियोग प्रस्ताव नरोकिने दाबी गर्नुभयो । प्रक्रियागत रुपमा त्यो प्रस्ताव पार लाग्ने उहाँको भनाइ थियो ।
“सबै प्रक्रिया पूरा गरी निर्णयार्थ पेस हुनेछ”–उहाँले भन्नुभयो, “संसद्मा छलफल चलिरहेको छ, यो प्रक्रियामा अब आलटाल हुँदैन ।” सभामुख घर्तीले राजनीतिक दल एक भएर संविधानको कार्यान्वयनमा लाग्नुपर्ने बताउनुभयो ।
संविधान कार्यान्वयन गर्ने समयमा दलभित्र धु्रवीकरण हुनु गलत भएको भन्दै छलफल गरेर असहमति हटाउँदै एक हुन उहाँले आग्रह गर्नुभयो । उहाँले देश र जनताको आर्थिक विकासका लागि दलहरूले मिलेर अघि बढ्नुको विकल्प नभएको बताउनुभयो ।
सभामुख घर्तीले दलहरू प्रतिस्पर्धामा उत्रिनु लोकतान्त्रिक पद्धति भए पनि अहिले त्यो समय नभएको बताउनुभयो ।
वि.सं.२०७३ कात्तिक २८ आइतवार ०३:११ मा प्रकाशित
