हामी सबैकाे संसारन्यूज

३ जेठ, नयाँदिल्ली । भारतको राजधानी नयाँदिल्लीबाट मुम्बईका लागि हिँडेकी २२ वर्षीय नेपाली महिलामाथि सामूहिक बलत्कार भएको छ । दिल्लीको द्धारकामा आइतबार राति चारजनाले बलात्कार गरेको प्रहरीले जनाएको छ । ती महिला मुम्बई पुगेपछि मात्र घटना बाहिर आएको हो । घटनालाई लिएर मुम्बईको ओसिवारा पुलिस थाानामा एफआइआर दर्ता भएको छ ।
प्रहरी अनुसन्धानमा ती महिला मुम्बईमा रहेका आफ्ना दाजु भेट्न भन्दै ९ मेमा चितवनबाट नयाँदिल्लीका लागि हिडेको खुलेको छ । उनी ११ मेमा दिल्ली पुगेपछि उनले मुम्बई जाने बस कहाँ छ भनेर सोधपुछ गर्न थालिन् । त्यहि क्रममा एकजनाले द्धाराका बाट जान्छ भनेपछि द्धारका पुगिन् । द्धारकामा उनी एक फलफूल पसलेको सम्पर्कमा पुगिन् ।
पसलेले उनलाई मुम्बई पठाइदिन्छु र आवस्यक व्यवस्था गरिदिन्छु भनेर आश्वासन दियो । साँझ पर्दैै गएपछि रातिको समयमा बाहिर बस्न हुँदैन भन्दै आफ्नो कोठामा जान अनुरोध गर्यो । मुम्बई पठाइदिन्छु भन्ने आश्वासन पाएकी ती महिलालाई थाहा थिएन, रक्षकका रुपमा प्रस्तुत भएको व्यक्ति नै केहीबेरमा भक्षक हुन्छ भन्ने । नजिकैको कोठामा लगेपछि उसले बलात्कार गर्यो । प्रहरीका अनुसार उसले आफूले बलात्कार गरेपछि अन्य तीन जनालाई बोलायो र उनीहरुले पनि बलात्कार गरे ।
प्रहरीका अनुसार मुख्य अभियुक्तले मुम्बईमा तेरो को छ भनेपछि उनले दाजुलाई भेट्न जान लागेको बताइन् । उसकै फोनबाट मुम्बईमा रहेका दाजुसँग कुरा गराएकी थिइन् । पछि अभियुक्तका साथीले ती युवतीलाई अटो रिक्सामा चढाएर दिल्ली स्टेशन पुर्याएर मुम्बई जाने रेलमा चढाइदिएका थिए । १३ तारिख राति उनी मुम्बई पुगेपछि मात्र उक्त घटना बाहिर आएको हो ।
युवतीका दाइको मोबाइल फोनका आधारमा घटनामा संलग्न मुख्य अभियुक्तको नाम र ठेगाना पहिचान भइसकेको छ । शुक्रबारको कान्तिपुर दैनिकबाट