३० कात्तिक, मस्कट (ओमन) । अमेरिकी विदेश मन्त्री जोन केरी यमनमा जारी द्वन्द्व अन्त्य गरी यमनमा स्थायी शान्तिका लागि छलफल गर्नका लागि सोमबार ओमनको मस्कट आइपुग्नुभएको छ ।
ओमनी राष्ट्रिय समाचार संस्था (ओएनए न्यूज एजेन्सी)ले जनाए अनुसार अमेरिकी विदेशमन्त्री केरीले आफ्नो ओमनको दुई दिनको बसाइमा यमनमा विगत एक बर्ष नौ महिनादेखि जारी द्वन्द्व अन्त्यका लागि पहल हुने बताउनुभयो । केरीको अमेरिकी राष्ट्रपति बाराक ओवामाको विदेशमन्त्रीका रुपमा मध्यपूर्वी मुलुक यमनमा शान्ति स्थापनार्थ गरिने यो नै सम्भवत अन्तिम भ्रमण हुनेछ ।
सोमबार उहाँले ओमनी विदेश मन्त्री यूसुफ विन अलावीसँग कुराकानी गर्ने र ओमन–अमेरिका सम्वन्ध तथा यमनको द्वन्द्व अन्त्यका लागि छलफल हुनेछ । यहाँको बसाइका क्रममा केरीले ओमनी सुलतान कावुससँग पनि भेट गर्ने कार्यक्रम रहेको छ ।
साउदी अरब नेतृत्वको सैन्य गठबन्धनले यमनी सरकारलाई इरानद्वारा सहयोगप्राप्त हुठी विद्रोहीविरुद्ध सन् २०१५ देखि चलाएको कारबाहीलाई सहजीकरण गर्दै यमनमा शान्ति स्थापनाका लागि अमेरिकी ओबामा प्रशासनको दूतका रुपमा केरीले उल्लेख्य भूमिका खेल्दै आउनुभएको छ । यद्यपि पहलले सार्थक रुप लिन सकेको भने छैन ।
यमनमा सन् २०१५ को मार्च महिनादेखि शुरुभएका द्वन्द्वमा परी अहिलेसम्म करिब सात हजार मानिसको मृत्यु भएको छ भने ३७ हजार मानिस घाइते भएका संयुक्त राष्ट्रसङ्घको तथ्याङ्क छ ।
अमेरिकी विदेशमन्त्री केरी ओमनपछि यमन, सिरिया लगायत यस क्षेत्रको द्वन्द्व अन्त्यका लागि छलफल गर्न संयुक्त अरब इमिरेट्स जानुहुनेछ । एएफपी
