१३ साउन, काठमाडौँ । भारतले आज राती १२ बजेबाट महाकाली पारिको धौलीगंगा जलविद्युत परियोजनाको ड्यामबाट पानी खोल्दैछ। जिल्ला प्रशासन कार्यालय दार्चुलाले ड्याम सोमबार रातिदेखि मंगलबार बेलुका ६.४५ बजेसम्म बाँध खोलिने जानकारी गराउँदै महाकाली नदिमा जलस्तर बढ्न सक्ने भन्दै पूर्वसूचना जारी गरेको छ ।
जिल्ला प्रशासन कार्यालय दार्चुलाका प्रमुख शंकरबहादुर विष्टले महाकाली नदी तटका सबै बस्तिहरूलाई सतर्क रहन दुई दिनअघि नै पूर्वसूचना जारी गरेका थिए।
प्रमुख विष्टका अनुसार परियोजनाको ड्यामको सरसफाइ नियमित कार्यभित्र पर्ने हुँदा यसबाट खासै नेपाली भूमिमा असर नगर्ने भएपनि वर्षाको याम भएको हुँदा ब्यास गाउँपालिका वडा नं ५ धौलाकोट देखि लेकम गाउँपालिकाको लाली सम्मका महाकाली नदी किनार तटिय क्षेत्रका वासिन्दालाई पूर्व सर्तकता अपनाउन भनिएको हो ।
