हामी सबैकाे संसारन्यूज

लामो समयदेखि प्रेममा रहेका विवेक र स्मृतिले ३० कात्तिकमा भागेर विवाह गरेका थिए । विवेक र स्मृतिले प्रेमविवाह गरेपछि केटीको माइती पक्षलेदलितले छोरी लगेको भन्दै असन्तुष्टि जनाएको थियो। त्यही क्रममा प्रेमविवाह गराउने मतियार भन्दै माइजू विष्णुदेवीलाई पक्राउ गराएको थियो ।

केटी पक्षकै आग्रहमा इलाका प्रहरी कार्यालय बेलबारीले विष्णुदेवीलाई नियन्त्रणमा लिएर एक दिन हिरासतमा थुनेको थियो । शुक्रबार दलित अधिकारकर्मीले दबाब दिएर केटा र केटीलाई हाजिर गराउने बताएपछि विष्णुमायालाई हिरासत मुक्त गरिएको थियो ।

इलाका प्रहरी कार्यालय बेलबारीका इन्स्पेक्टर मेघराज थापाले राजीखुसी बिहे गर्न केटीको उमेर नपुगेको दाबी माइती पक्षको भएको र खोजतलास गरिपाऊँ भनेर निवेदन दिएकाले सोधपुछका लागि केटाकी माइजूलाई नियन्त्रणमा लिएको बताए ।

उनले केटा र केटी हाजिर भएपछि दुवै पक्षको छलफलले गरेको निर्णयलाई मान्यता दिने बताए । केटा पक्षले बिहे गरिसकेको जोडीलाई अलग गराउन प्रहरीले सघाएको आरोप लगाएको छ । कानुनअनुसार राजीखुसी प्रेमविवाह गरेर गएपछि कसैले पनि उनीहरूका अभिभावक वा आफन्तलाई मतियार बनाएर दुःखदिन मिल्दैन ।