Sansar News
२१ साउन, काठमाडौं । उदयपुर, दाङ, कैलाली र नवलपरासी(पश्चिम)मा छुट्टाछुट्टै सवारी दुर्घटनामा परी ६ जनाको मृत्यु भएको छ ।
उदयपुर, त्रियुगा नगरपालिका -९ गैरुनस्थित सडकमा स.५ प ३६३७ नम्बरको मोटरसाइकलको ठक्करबाट सोही ठाउँ बस्ने मनमाया श्रेष्ठको सोमबार राति मृत्यु भएको छ ।
ठक्करबाट गम्भीर घाइते भएकी उनको त्रियुगा अस्पतालमा उपचारको क्रममा मृत्यु भएको हो । मोटरसाइकल र चालकलाई प्रहरीले नियन्त्रणमा लिएको छ ।
त्यसैगरी दाङ, गढवा गाउँपालिका -५ बाँकीचोकस्थित सडकमा लु.५ प ९७११ नम्बरको मोटरसाइकलको ठक्करबाट गम्भीर घाइते भएका पैदलयात्री सोही गाउँपालिका सोनपुरुवा बस्ने गंगाराम यादवको लमही अस्पताल दाङमा उपचारको क्रममा सोमबार राति मृत्यु भएको हो ।
मोटरसाइकल र चालकलाई प्रहरीले नियन्त्रणमा लिएको छ ।
त्यस्तै कैलाली, गौरीगंगा नगरपालिका– ८ लिक्मास्थित भित्री सडकमा सोमबार साँझ से.४ प ७६११ नम्बरको मोटरसाइकलको ठक्करबाट गम्भीर घाइते भएका पैदलयात्री धिमु चौधरीलाई थप उपचारको लागि मेडीकल कलेज कोहलपुर लैजाने क्रममा बाटोमै मृत्यु भएको हो ।
मोटरसाइकल र चालकलाई प्रहरीले नियन्त्रणमा लिएको छ ।
यसैबीच नवलपरासी सुनवल नगरपालिका -१२ हरनैयास्थित सडकमा लु.४० प ३७९८ नम्बरको मोटरसाइकल अनियन्त्रित भई मंगलबार बिहान दुर्घटना हुँदा चालक रामग्राम नगरपालिका १० बस्ने अम्मरजित चौधरीको घट्नास्थलमै मृत्यु भएको छ ।
दुर्घटनाका सम्बन्धमा स्थानीय प्रहरीले थप अनुसन्धान गरिरहेको बताइएको छ ।
वि.सं.२०७६ साउन २१ मंगलवार १३:०३ मा प्रकाशित
