हामी सबैकाे संसारन्यूज

२२ साउन, काठमाडौं । भारतले घरेलु टोलि वेस्ट ईन्डिजसँगको ३ खेलको टी–२० क्रिकेट सिरिज(T-20 Cricket Series) मा क्लिनस्वीप गरेको छ । तीन खेलको सिरिजमा भारतले ३–० को जितसहित क्लिनस्वीप गरेको हो । मंगलबार राति भएको भएको तेस्रो तथा अन्तिम खेलमा वेस्ट इन्डिज ७ विकेटले पराजित भएको थियो ।

१ सय ४७ रनको विजयी लक्ष्य पछ्याएको भारतले १९.१ ओभरमा ३ विकेटको क्षतिमा पुरा गर्यो । भारतको जितमा युवा विकेटकीपर ऋषभ पन्तले ४२ बलमा समान ४ चौका र छक्का सहित ६५ रनमा अविजित रहँदै टोलीको जित पक्का गरे । ऋषभ पन्तले ४२ बलमा नटआउट ६५ रन बनाए । त्यस्तै कप्तान विराट कोहली ४५ बलमा ६ चौका सहित ५९ रनमा आउट भए । ओपनर केएल राहुल २०,शिखर धवन ३ रनमा आउट हुँदा मनिष पाण्डे २ रनमा अविजित रहे । भारतका दीपक चाहरले सर्वाधिक ३ विकेट तथा नवदिप सैनीले २ विकेट लिएका थिए ।

यसअघि टस हारेर सुरुवाती ब्याटिङ गरेको वेस्ट इन्डिजले ६ विकेटको नोक्सानीमा १४६ रन बनाएको थियो । किरोन पोलार्डले ४५ बलमा ६ छक्का र १ चौकासहित ५८ रन बनाएका थिए । रोभमन पोवेलले २० बलमा नटआउट ३२ रन बनाएका थिए । वेस्ट इन्डिजका लागि ओशन थोमसले २ विकेट लिए ।

भारतले पहिलो खेल ४ विकेट र दोस्रो खेल डकवर्थ लेविस पद्धतीको आधारमा २२ रनले जितेको थियो । भारतले वेस्ट इन्डिजसँग थप तीन एक दिवसीय र दुई टेष्ट सिरिज खेल्नेछ । पहिलो वान डे खेल बिहीबार हुनेछ ।

भारतले सन् २०११ पछि पहिलो पटक वेस्ट ईन्डिजलाई उसको भूमिमा हराएको हो । भारतले टी–२० मा विदेशमा दोस्रो पटक ३–० ले जितेको छ ।