हामी सबैकाे संसारन्यूज

११ भदौ, काठमाण्डौं । गैरआवासीय नेपाली संघ (एनआरएनए) को केन्द्रीय उपाध्यक्षमा युकेबाट थर्क प्रेम सेनले उम्मेदवारी घोषणा गरेका छन् ।

संघको आगामी अक्टोबरमा हुन लागेको नवौं सम्मेलन (२०१९–२०२१) का लागि सेनले उपाध्यक्षमा आफ्नो उम्मेदवारी घोषणा गरेका हुन् ।

संस्थामा तन, मन,धन अनि ज्ञानले सहयोग गरौं भनेर एनआरएनएको स्थापनाकालदेखि सक्रिय रहेका सेन एनआरएनए बेलायतको संस्थापक सदस्य, उपाध्यक्ष हुँदै आइसिसि सदस्य तथा एनआरएनएको महत्वपूर्ण विभाग एनआरएनए रोड सेफ्टी टाक्सफोर्सको संयोजक भएर महत्वपूर्ण कामहरु गर्दै आएका छन् ।

विशेष गरेको अहिले नेपालको अवस्यकता Skill, Knowledge, Innovation & Technology (SKIT) नै रहेको ठहर गरेका सेनले विभिन्न चरणमा कार्यक्रमहरु गरेर नेपालका सांसद, मन्त्रीदेखि प्रधानमन्त्री सम्मलाई युके र युरोपको रोड सेफ्टीबारे प्रस्तुति दिएका छन् । त्यहि अनुसार नेपालको सडक व्यवस्थापन गर्न सकिने भनेर युरोप र युकेको मोडलबारे जानकारीसहित आफैले तयार पारेको रोड सेफ्टीबारे लेखिएको बुक समेत हस्तान्तरण गरिसकेका छन् । ‘देशलाई यतिबेला अत्यावस्यक रहेको तथा चाहिएको Skill, Knowledge, Innovation & Technology (SKIT) मा सहयोग तथा हस्तान्तरण गरौं भन्ने मेरो मूल उद्धेश्य हो,’ सेनले संसारन्युजसँग भने, ‘देशलाई यतिबेला चाहिएको पनि त्यहि हो, सबैकुरा हामीबाटै सम्भव छ भनेर लागेको छु ।’

संस्थामा नलेज, स्किलको सेयर भन्दा पनि पछिल्लोपटक पैसा भएका नै नेतृत्वमा गएको देखिएको आरोप आइरहेको परिस्थितिमा आफूले पैसा बाड्ने नभएर त्यस्तो कुरालाई निरुत्साहित बनाउने अभियानमा आफू लागेको बताउँछन् सेन ।

संघका पाँच उपाध्यक्षपदमा पाँचवटा विभाग जिम्मादिने गरि संसोधन गरिएको संघको विधानमा महिला उपाध्यक्षलाई महिला विभाग दिइने र अन्यलाई वैदेशिक, वेलफेयर, लगानी टुरिजम र स्कील, नलेज तथा टेक्नोलोजी हेर्ने गरेर फरक विभागको जिम्मा दिइएको छ । ‘त्यहि अन्तर्गत एउटा विभाग मेरो पनि पर्छ र अहिलेसम्म त्यस क्षेत्रबाट कोही साथिहरुले दावी नगरेकोले मैले उपाध्यक्षको नेतृत्व लिएर संघमा कामगर्न पाउँछु भन्ने विश्वास छ ।’

भाषण गर्न र पैसा खन्याएर नेतृत्व लिने सोच आफ्नो नभएको बताउँने सेनले आफ्नो तर्फबाट संस्था तथा देशमा Skill, Knowledge, Innovation & Technology (SKIT) लगानी गर्नेमै विशेष ध्यान रहेको बताउँछन् ।