हामी सबैकाे संसारन्यूज

५ कात्तिक, बैतडी । सोमबार मध्यान्ह् १२ बज्दै थियो । स्थानीय केशव जोशी डोजर लिएर दशरथचन्द नगरपालिका ९, ग्वाल्ले गाउँमा आइपुगे । यो ठाउँमा सडक बनाउन संघीय प्रदेश वा स्थानीय तह कसैको पनि योजना थिएन । तर, जोशीको डोजरले काम पाइरहेको थिएन । त्यसैले उनले आफ्नै गाउँमा डोजर लिएर गए । साथमा थिए चालक किशोर बोहोरा ।

केशव स्थानीय सडक उपभोक्ता समितिका पूर्वअध्यक्ष हुन् । तर, सो क्षेत्रमा सडक खन्ने विषयमा गाउँलेवीच सहमति हुन सकेको थिएन । त्यसैले नयाँ समिति बनेको थियो । तर, पनि सडक खन्ने विषयमा सहमति जुटिसकेको थिएन ।

स्थानीय दशरथ चन्द नगरपालिकाले पनि यसको लागि कुनै बजेट छुट्याएको थिएन । स्थानीय जनप्रतिनिधिलाई अहिले बाटो खन्दै गर्छु, पैसा पछि मिलाउँला भनेर सहमति गरेको उनको भनाइ छ । तै पनि मेयरले यस्तो बचन दिएको स्वीकार नगरेको बुधबारको नयाँपत्रिका दैनिकमा समाचार छ ।

गाउँमा अचानक डोजर आएर स्थानीयको बारी खन्न थालेपछि सबैले डोजरको विरोध गरे । स्थानीय डोजरको अगाडि उभिए । तर, डोजर रोकिएन डोजर अगाडि उभिएका आठ जनास्थानीयलाई सोहोरेर घाईते बनाएपछि बल्ल डोजर रोकियो । डोजर चालक बोहोरा पक्राउ परेका छन् ।