Sansar News
नैरोबी । केन्याले अमेरिकी सहयोगमा निर्माणाधीन इबोला क्वारेन्टाइन सुविधासम्बन्धी तयारीका काम तत्काल रोक्न आदेश दिएको छ ।
यसअघि अदालतले दिएको सोसम्बन्धी आदेश पालना नगरेको आरोपमा स्वास्थ्यमन्त्रीलाई अदालतको अवहेलनाको मुद्दा लागेपछि उनले मङ्गलबार अदालतलाई उक्त जानकारी गराएका हुन् ।
केन्याका स्वास्थ्यमन्त्री अदेन दुआलेले अदालतमा पेश गरेको वक्तव्यमा उक्त सुविधासँग सम्बन्धित निर्माणस्थल तयारी तथा अन्य सबै गतिविधि तत्काल र पूर्ण रूपमा बन्द गर्न निर्देशन दिएको उल्लेख गरेका छन् । उनले मूल मुद्दाको सुनुवाइ र फैसला नभएसम्म वा अदालतबाट अर्को आदेश जारी नभएसम्म काम स्थगित रहने बताए ।
संयुक्त राज्य अमेरिकाले गत महिना ‘डेमोक्रेटिक रिपब्लिक अफ द कङ्गो’मा सुरु भएको इबोला प्रकोपबाट प्रभावित क्षेत्रबाट आफ्ना नागरिकलाई आवश्यक परे उद्धार गर्न सकियोस् भन्ने उद्देश्यले ‘लाइकिपिया एयर बेस’मा उक्त सुविधा निर्माणको तयारी गरिरहेको थियो ।
यस विषयमा दायर गरिएको मुद्दाको थप सुनुवाइ अदालतमा जारी रहेको जनाइएको छ । (रासस/एएफपी)
वि.सं.२०८३ असार १० बुधवार ०७:२८ मा प्रकाशित
