हामी सबैकाे संसारन्यूज

२६ कात्तिक । अनलाइन सपिङ कम्पनी दराजविरुद्ध ठगीको उजुरी परेको छ । दराजमार्फत अर्डर गरिएको सामान अनलाइनमा देखिँदा एउटा तर ग्राहकको घरमा आइपुग्दा फरक आउने गरेको उजुरी परेपछि वाणिज्य आपूर्ति तथा उपभोक्ता हित संरक्षण विभागले छानविन सुरु गरेको हो ।

विभागले शुक्रबार दराजको नक्सालस्थित कार्यालयमा अनुगमन गरी दराजका सञ्चालकलाई २४ घण्टा भित्र उपस्थित हुन पुर्जी काटेको थियो । विभागका अनुगमन शाखा अधिकृत रमेशकाजी श्रेष्ठका अनुसार सामान फरक पर्ने गरेको भन्ने उजुरीका आधारमा विभागले छानविन अघि बढाएको हो ।

विभागले पुर्जी काटेपछि दराजका प्रतिनिधि विभागमा आएर छलफल गरेका थिए । दराजका प्रतिनिधिले आफूहरु बिक्रेता नभइ सहजकर्ता मात्रै भएको जानकारी गराएको विभागका निमित्त महानिर्देशक नोखबहादुर बस्यालले जानकारी दिए । उनीहरुले आफ्नो वेबसाइटमा सामान बिक्रीका लागि राखेको नभइ अन्य विक्रेताले आफ्नो वेबसाइट प्रयोग गरी सामान बिक्री गरेको बताएका थिए ।
अनुगमनमा कैफियत भेटिए कारवाही हुने निमित्त महानिर्देशक बस्यालले बताएका छन् ।