Sansar News
२६ कात्तिक, काठमाण्डौं । सीमा नदिमा दुई देशको बराबरी हक हुनुपर्ने हो । तर, २४ वर्षअघि भएको एकिकृत महाकाली सन्धिमा महाकाली नदीको पानी असमान ढंगले वितरण गर्ने व्यवस्था गरियो । सन्धिमै ठगिएको नेपालले त्यसअनुसार पाउनुपर्ने पानी पनि अझै पाएको छैन ।
२९ माघ ०५२ मा भएको महाकाली सन्धि अनुसार नेपालले टनकपुर र शारदा व्यारेजबाट सिँचाइका लागि हिउँदमा ८०० र वर्षायाममा दुई हजार तीन सय ५० क्युसेक पानी पाउनुपर्ने हो । तर, अहिले शारदा व्यारेजबाट मुस्किलले हिउँदमा १५० र वर्षायामा ६५० क्युसेक पानी मात्र पाइरहेको मंगलबारको नयाँपत्रिकामा समाचार छ ।
सन्धि अनुसार नेपालले शारदा ब्यारेजबाट हिउँदमा एकसय ५० र वर्षायाममा एक हजार क्युसेक, टनकपुर ब्यारेजबाट हिउँदमा तीनसय र वर्षायाममा १ हजार क्युसेक तथा चाँदनी (हालको महाकालि नगरपालिका) क्षेत्रको सिँचाइका लागि शारदा व्यारेजबाट बाह्रै महिना तीनसय ५० क्युसेक पानी पाउनु पर्ने हो । तर, वनबासा क्षेत्रबाट हिउँदमा एकसय ५० र वर्षामा अधिकतम ६ सय ५० क्युसेक पानीमात्र नेपालले पाइरहेको छ ।
वि.सं.२०७६ कात्तिक २६ मंगलवार ०८:४७ मा प्रकाशित
