हामी सबैकाे संसारन्यूज

काठमाडौंमा आयोजना हुने तय भएको International Association for Tibetan Studies (IATS) को १७औँ अन्तर्राष्ट्रिय सम्मेलन नेपालमा आयोजना गर्न सरकारले रोक लगाएपछि अब भर्चुअल माध्यमबाट सञ्चालन हुने भएको छ।

काठमाडौं विश्वविद्यालयअन्तर्गतको Himalaya Centre for Asian Studies तथा Centre for Buddhist Studies को सहआयोजनामा अगस्ट २३ देखि २६, २०२६ सम्म काठमाडौंमा सम्मेलन गर्ने तयारी गरिएको थियो। सम्मेलनमा विभिन्न देशका तिब्बत अध्ययनसम्बन्धी अध्येता, प्राध्यापक तथा अनुसन्धानकर्ताहरू सहभागी हुने तयारी थियो।  IATS को बोर्डले निर्धारित समयमै सम्मेलन भर्चुअल माध्यमबाट आयोजना गर्ने निर्णय गरेको छ।

तर नेपाल सरकारका उच्च अधिकारीहरूले सम्मेलन आयोजना नगर्न आग्रह गरेपछि काठमाडौं विश्वविद्यालयले सहआयोजकको भूमिकाबाट पछि हटेको आयोजकहरूले बताएका छन्। सरकारको निर्देशनपछि नेपालमा भौतिक रूपमा सम्मेलन गर्न नसकिने जानकारी आयोजकलाई मौखिक रूपमा दिइएको भए पनि अहिलेसम्म सरकारबाट औपचारिक लिखित निर्णय भने प्राप्त नभएको बताइएको छ।

आयोजक पक्षका अनुसार नेपाल सरकारका उच्च अधिकारीहरूले कार्यक्रम नगर्न आग्रह गरेका थिए, तर त्यसको स्पष्ट कारण दिइएन। सम्मेलनमा तिब्बतसम्बन्धी अध्ययन, इतिहास, संस्कृति, धर्म, समाज, भाषा तथा अन्य शैक्षिक विषयमा छलफल हुने तय भएको थियो।

नेपाल र चीनबीच लामो समयदेखि मैत्रीपूर्ण तथा रणनीतिक सम्बन्ध रहँदै आएको छ। नेपालले आफ्नो भूमिबाट चीनविरुद्ध हुने कुनै पनि पृथकतावादी वा राजनीतिक गतिविधिलाई अनुमति नदिने नीति लिँदै आएको छ।

तिब्बतको विषय चीनका लागि अत्यन्त संवेदनशील विषय हो। त्यसैले नेपालमा तिब्बतसम्बन्धी अन्तर्राष्ट्रिय सम्मेलन आयोजना हुने विषयमा चीनले चासो राखेको हुन सक्ने अनुमान गरिएको छ।