हामी सबैकाे संसारन्यूज

प्रवासी नेपाली मञ्च (ओएनएफ) अमेरिका महादेश कमिटीको अध्यक्षमा यमुना भट्टराई सर्वसम्मत रूपमा निर्वाचित भएकी छन्। आइतबार सम्पन्न मञ्चको प्रथम अधिवेशनबाट टेक्सास निवासी भट्टराई अध्यक्षमा चयन भएकी हुन्।

अधिवेशनले उपाध्यक्षमा एकनारायण सुवेदी, सचिवमा पूर्ण खड्का र उपसचिवमा केदार पहाडीलाई चयन गरेको छ।

त्यसैगरी कमिटी सदस्यहरूमा क्षत्रकुमारी गुरुङ, कृष्ण भण्डारी, रेशम घर्ती, डम्बर थापा सिंजाली मगर, राज थापा, सुजित खड्का र भानु सापकोटा चयन भएका छन्।

नेकपा (एमाले)का नेता काशीनाथ अधिकारीको प्रमुख आतिथ्यतामा सम्पन्न अधिवेशनको उद्घाटन सत्रमा एमाले केन्द्रीय सदस्य तथा ओएनएफका निवर्तमान अध्यक्ष सञ्जय थापा, प्रवासी नेपाली मञ्चका उपसचिव प्रभुराम थापा, सचिवालय सदस्य कुन्ती थापालगायतका नेताहरूले सम्बोधन गरेका थिए।

सम्बोधनका क्रममा वक्ताहरूले बदलिँदो राजनीतिक तथा सामाजिक परिस्थितिमा प्रवासी नेपाली मञ्चको भूमिका, प्रवासमा रहेका नेपालीलाई संगठित गर्ने विषय तथा नेपालको समृद्धि र विकासमा प्रवासी नेपालीको योगदानका विषयमा धारणा राखेका थिए।