हामी सबैकाे संसारन्यूज

१ मंसिर, काठमाण्डौं । आफैले बनाउन लगाएको बम विस्फोटमा घाइते भएकाहरुलाई जिउदै ईटाभट्टामा हाल्ने आफताव आलमलाई नख्खु जेलमा राखिएको छ । शनिबार बिहान नख्खु ल्याइएका उनलाई सिआरसी (कम्युनिटी रिह्याबिटेसन सेन्टर) ब्लकमा राखिएको छ ।सो ब्लकमा लागु औषध दुव्र्यसनी र हत्या अभियोगका थुनुवा राखिन्छ ।

नख्खु कारागार श्रोतका अनुसार शनिबार बिदाको दिन परेकाले उनलाई लागुऔषध दुव्र्यसनीका थुनुवासँगै राखिएको आइतबारको नयाँपत्रिका दैनिकमा समाचार छ ।

पुर्पक्षका लागि जेल पठाउन रौतहट जिल्ला अदालतले आदेश दिएपछि शुक्रबार राति गौरबाट हिँडाइएका आलमलाई शनिबार बिहान ४ बजे नख्खु पुर्याइएको थियो । शनिबार उनले सिआरसी ब्लकमै आराम गरेका थिए । उनी दिउँसो एकछिन कारागारमै टहलिएका थिए । केहीबेर आफन्तसँग पनि भेटघाट गरेको कारागार स्रोतले बतायो । मधुमेहका रोगी आलमलाई परिवारले कारगारमै औषधि लगिदिएका थिए ।