हामी सबैकाे संसारन्यूज

१३ मङ्सिर, काठमाडौँ । कानुन संकायका विद्यार्थीहरु कहाँ हुनुपर्ने होला, तपाई आफैँ अनुमान गर्नुहोस् त, कतै कानुनी प्राक्टिसमा वा आफ्नै कलेजको क्लासमा । तर, चक्रवर्ति हवि एजुकेशन एकेडेमी कलेजमा बिए.एल.एल.बी चौथो र पाँचौ वर्षमा अध्ययन गरिरहेका ३० विद्यार्थीहरु भने स्वयमसेवका रुपमा सडकमा ट्राफिक व्यवस्थापनका लागि उत्रिएका हुन् ।

मङ्सिर ८ गतेदेखि एकहप्ताको लागि उनीहरुले स्वयमसेवक बनेर ट्राफिक व्यवस्थापनमा प्रहरीलाई सघाएका उनीहरुले बाटो काट्ने कतिपय बटुवाले नियम उल्लघंन गरेको, अटेर बनेर जहाँ पायो त्यहिँबाट बाटो काट्ने, जेब्राक्रसिङबाट बाटो काट्दा दाँयाबाँया नहेरी फोनमा बोल्दै यात्रुहरुलाई पनि छिटो बाटो काट्नुपर्ने तथा सवारी चालकलाई पनि छिटो जानुपर्ने कारण दुर्घटनाको ठूलो जोखिम रहेका अनुभव आफूहरुले गरेको उनीहरु बताउछन् ।

‘जेब्राक्रसिङ त हो, जतिबेलापनि बाटो काट्न पाउनुपर्छ भन्ने मानसिकताको विकास भएको रहेछ । जेब्राक्रसिङबाट बाटो काट्दा गाडी रोकिहाल्छ, भन्ने सोचले मानिसहरु कतै नहेरी बाटो काट्ने र रोक्न खोज्दा रिसाउने, हतार छ हामीलाई नरोक्नुस समेत भन्ने गरेको आफ्नो एकसाताको ट्राफिक व्यवस्थापनको अनुभव सुनाउँदै संसारन्युजसँग उनीहरुले भने ।

यो तपाईहरुको काम होइन, भन्ने जस्ता जवाफहरु फर्काउने र प्रायजसो विद्यार्थीहरुले नै लापरवाहि गरेको पद्य्मोदयचोकमा खटिएकी राजविराजकी स्वयंसेवक कविता यादवले बताइन् । सातदिनको समयमा ट्राफिक नियमबारे उनलाई पनि धेरै सिक्ने मौका मिलेको उनको अनुभव छ । उनी भन्छिन्–अचम्मै लाग्यो जेब्रा क्रसिङबाट कुकुरले समेत बाटो काटेको देख्यौं । कुकुरलाई ‘रोक’ भन्दा जेब्रा क्रसिङको छेउमा रोकिएर गाडि गएपछिमात्र उ पनि पारी गयो । मानिसभन्दा कुकुर ज्ञानी रहेछन् की जस्तो अनुभव त्यस घटनाले भयो ।

त्यस्तै अर्र्की स्वयंसेवक पाल्पाकी वर्षा कार्की भन्छिन्–ट्राफिकको कामधेरै गाह्रो हुँदोरहेछ यो एकहप्तामा नजिकबाट महसुस गरियो । कहिले यता कुद्नु पर्ने कहिले उता, चालक, बटुवाहरुले कुरा नसुन्दा विवाद नगरी सुखै नहुने । उभिएरै काम गरिरहनु पर्ने । अझ त्यो धूलो, धुँवा, प्रदूषणले स्वास्थ्यमा कति असर पार्यो होला, त्यसको कुनै हिसाबकिताब नै छैन ।

कार्कीका अनुसार दिनभरी बाटोमा बसेर ट्राफिक व्यवस्थापनमा लागेका ट्राफिक प्रहरीलाई सवारी चालक तथा बटुवाले भनेको मानिदिएर सहयोग गर्दा उनीहरुको कामप्रतिको सम्मान हुनेछ ।

त्यसैगरि ललितपुरकी अर्की स्वयंसेवक इम्रना विष्टको पनि त्यस्तै अनुभव छ, आफूलाई एकहप्ता स्वयंसेवक भएर कामगर्दा धेरै कुरा सिक्न र जान्न पाइएको उनी बताउँछिन् । नेपाली ट्राफिक प्रहरीहरुले कति दुःख पाउँदा रहेछन् भन्ने कुरा पनि महसुस भयो । केहि मान्छेले नियम उल्लघंन गर्दै हिँडे पनि धेरैले भने राम्रो प्रतिक्रिया दिएको उनको अनुभव छ । ‘धेरैले ‘थ्यांक्यु’ राम्रो काम गर्नुभयो । यो, हाम्रै सुरक्षाको लागि हो, भनेर धन्यवाद पनि दिए’ आफ्नो अनुभव संसारन्युजसँग सेयर गर्र्दै उनले भनिन् ।