हामी सबैकाे संसारन्यूज

२२ मंसिर, काठमाडौं । नेपाल १३ औँ दक्षिण एसियाली फुटबल (साग) अन्तर्गत पुरुष फुटबलको फाइनलमा पुगेको छ ।
साग फुटबलको साविक विजेता रहेको नेपालले आइतबार भएको समूह चरणको अन्तिम खेलमा बंगलादेशलाई १–० ले हराउँदै फाइनलमा पुगेको हो । नेपाल लगातार दोस्रो पटक विजयी भएको हो ।

त्रिपुरेश्वरस्थित दशरथ रंगशालामा भएको आजको खेलमा नेपालले ११ औं मिनेटमा नै अग्रता लिएको थियो । कप्तान सुजल श्रेष्ठको पासमा पहिलो हाफको सुरुवाती समयमा नै सुनिलले गोल गरेका हुन् ।

पहिलो हाफमा नेपालले केही अवसर पाएपनि गोलमा परिणत गर्न सकेन । दोस्रो हाफमा भने नेपालले रक्षात्मक खेल खेलेको थियो।

खेलको अन्तिममा बंगलादेश १० खेलाडीमा सिमित भएको थियो । नेपाली खेलाडीलाई फउल गरेपछि दोहोरो पहेँलो कार्डसँगै रातो कार्ड पाएका थिए ।

नेपाल यस नतिजासँगै लिग चरणको विजेता बनेको छ । लिगमा नेपालले ४ खेलमा १० अंक जोडेको छ भने दोस्रो स्थानमा रहेको भुटानले ९ अंक हासिल गरेको छ ।

समूह चरणको आफ्नो पहिलो खेलमा नेपालले भुटानलाई ४–० ले हराएको थियो ।अब नेपालले सागको अन्तिम दिन स्वर्णका लागि भुटानसँग खेल्नेछ । समूह चरणको खेलमा नेपालले भुटानलाई ४– ० ले हराएको थियो । बंगलादेश ४ अंकसहित कास्य पदकमा सिमित रह्यो । श्रीलंका र माल्दिभ्स २–२ अंकसाथ पुछारमा रहेका छन् ।