हामी सबैकाे संसारन्यूज

२७ मङ्सिर, काठमाडौँ । प्रदेश–१ को अर्थ मन्त्रालयबाट झापाका केहि सामाजिक संस्थाहरुलाई बजेट विनियोजन गर्न अर्थमन्त्री ईन्द्र आङ्बोको सचिवालयका केहि सदस्यले घुस मागेको खुलेको छ । झापाको नेपाल कम्युनिष्ट पार्टी जिल्ला कमिटी भित्र गुटको खेल भइरहेको समयमा अर्को चलखेल प्रकरण बाहिर आएको हो ।

जिल्लाको राजनितिमा असाध्यै सम्मानित नेता मानिने पूर्व सांसद गौरी शङ्कर खड्का, नर बहादुर कर्मचार्य लगायतका दिवंगत नेताहरुकोे नाममा स्थापित प्रतिष्ठानलाई बजेट माग्दा मन्त्रीको सचिवालयका पदाधिकारीहरुले ३ लाख रुपैयासम्म घुस मागेको वताइएको छ । खड्का ०६५ सालको पहिलो संविधान सभाबाट निर्वाचित सभासद हुन भने कर्माचार्य नेपाल कम्युनिस्ट पार्टिको संस्थापक सदस्य हुन ।

तिनै प्रतिष्ठान सञ्चालनका लागि प्रतिष्ठानका पदाधीकारीहरूले अर्थमन्त्री आङ्वोको सचिवालयमा आबस्यक बजेट विनियोजनका लागी आग्रह गरेका थिए । तर बजेट विनियोजन नभएपछि पुन मन्त्री भेट्न गएका प्रतिष्ठानका सदस्यहरूलाई मन्त्रीको सचिवालयका पदाधीकारीहरूले ३ लाख रुपैँयासम्म घुस दिए बजेट मिलाई दिने बताएको स्रोतले बताएको छ ।

झापाको दमक नगरपालीका– ८ बालुवाटारको ५० विघा ऐलानी जग्गा अपचलन गरेर बेचेको आरोप लागेर जिल्ला नेता गगन पुरी फरार भएको घटना सेलाउन नपाउँदै यो घटना बाहिर आएको हो ।