Sansar News
२ पुष, काठमाण्डौं । सबै प्रकारका वर्गिय शोषणसहित लिंगीय असमानता हटाउन लडेको नेपाल कम्युनिष्ट पार्टीभित्र सचिवालय बैठकमा पुरुष मात्र बस्दा कुनै खिन्नता नभएकोमा महिला नेतृत्वहरुले क्षोभ प्रकट गरेका छन् ।
समाज रुपान्तरणको संवाहक ठानिने नेपाल कम्युनिष्ट पार्टीको सबैभन्दा माथिल्लो कमिटी सचिवालयमा १ जना पनि महिला नराखिएको र स्थायी कमिटी हुँदैं केन्द्रीय कमिटी र प्रदेश तथा जिल्लाका कमिटीहरुमा महिलाको संख्या न्यून रहेको बर्तमान अवस्थामा नेतृ पंफा भुसाल र अष्टलक्ष्मी शाक्यले कम्युनिष्ट पार्टी भन्न लाज लाग्ने अवस्था भएको बताएका छन् ।
आइतबारदेखि जारी स्थायी समितिको बैठकमा मौखिक र लिखित रुपमा आफ्ना धारणा राखेकी नेतृ पंफा भुसालले संजालमार्फत नै यस्तो कुरा सार्वजनिक गरेकी छन् । विषवस्तुलाई बंग्याएर संप्रेषण गरिरहेको कारण उनले संजालमार्फत् राखेको कुरो प्रष्ट्याएकी छन् ।
अध्यक्ष प्रचण्डद्धारा प्रस्तुत राजनैतिक प्रतिवेदन र महासचिव विष्णु पौडेलद्धारा प्रस्तुत विधान संशोधन सम्बन्धी ऐजेन्डामा भाग लिँदै कम्तिमा २ महिला सहित १५ जनाको सचिवालय बनाउनुपर्ने, पार्टीको माथिदेखि तलसम्म महिला उपाध्यक्ष पद व्यवस्था गरिनुपर्ने, स्थायी समितिदेखि पार्टीको सबै तहमा महिला संख्या थपिनुपर्ने विषयमा दुई नेतृले लिखित रुपमा राखेको बताइएको छ । कम्युनिष्ट पार्टी आफैले महिला शसक्तिकरण गराउनुपर्नेमा संवैैधानिक प्रावधान समेत नपुर्याएकोमा नेतृहरुले आक्रोश व्यक्त गरेका छन् ।
वि.सं.२०७६ पुस २ बुधवार ०९:१६ मा प्रकाशित
