हामी सबैकाे संसारन्यूज

१५ माघ, काठमाण्डौं । नेपाल कम्युनिस्ट पार्टी (नेकपा)को केन्द्रीय कमिटी बैठकले पार्टी महाधिवेशनको मिति टुंगो लगाएको छ । आगामी वर्ष ०७७ सालको चैत २५ देखी ३० गतेसम्म पार्टी महाधिवेशन गर्ने विषयमा शीर्ष नेताहरु सहमत भएका छन् । यस निर्णयलाई केन्द्रीय कमिटीले पारित गर्नेछ ।

आजैबाट शुरु भएको बैठक काठमाडौंको राष्ट्रिय सभागृहमा बसिरहेको छ । पार्टी कार्यालयमा सबै अट्न सम्भव नभएकाले सभागृहको हलमा बैठक बसेको हो । बैठकको प्रधानमन्त्री केपी ओलीले उद्घाटन मन्तव्य राखेका थिए ।

एमाले र एमाओवादी पार्टी एकतापछि यो दोस्रो बैठक हो । केन्द्रीय कमिटी बैठकमा ४ सय ४५ जना सदस्य छन् । बैठकमा अध्यक्षद्वय केपी शर्मा ओली र पुष्पकमल दाहालले राजनीतिक प्रतिवेदन पेश गरेका छन् भने महासचिव विष्णु पौडेलले सांगठानिक प्रतिवेदन पेस गर्ने तयारीमा छन् ।

तत्कालिन एमाले र माओवादी केन्द्रबीच २०७५ जेठ ३ मा पार्टी एकता भएपछि दोस्रो पटक बस्न लागेको यो बैठकले विधान संशोधन प्रस्ताव अनुमोदन गर्नेछ । विधान संशोधन भएपछि वामदेव गौतम उपाध्यक्ष हुनेछन् ।