हामी सबैकाे संसारन्यूज

२९ फागुन, कोरिया । गैरआवासीय नेपाली संघ एनआरएनएकी पूर्वएसिया प्यासेफिकी महिला संयोजक तथा संघकी मानार्थ सदस्य जुनु गुरुङले फ्रि माक्स वितरण सुरु गरेकी छन् ।

लामो समयदेखि कोरियामा रहेकी समाजसेवी तथा शुभेच्छा रेष्टुरेण्ट र मार्टकी संचालिका जुनु गुरुङले दुङमेनस्थित आफ्नै रेष्टुरेण्टबाट निःशुल्क मास्क वितरण अभियान सुरु गरेकी हुन् ।

चीनमा कोरोना भाइरसको संक्रमण देखिनासाथ आफ्नो रेष्टुरेण्ट र मार्टमा आउने नेपालीलाई निःशुल्क माक्स वितरण गरेको जुनुले संसारन्युजलाई बताइन् ।

उनले आफ्नो सम्पर्क आउनेलाई निःशुल्क माक्स वितरण गरिरहने पनि जानकारी दिइन् ।

दक्षिण कोरियामा अहिलेसम्म कोरोना भाइरस संक्रमणबाट ६६ जनाको मृत्यु भइसकेको छ भने ७ हजार ८ सय ६९ जनामा संक्रमण देखिएको छ । जसमा तीनसय ३३ जना निको भएको तथ्यांक रहेको छ ।

कोरियामा कोरोना भाइरसको संक्रमण बढेपछि त्यसको नियन्त्रणका लागि कोरियन सरकारले व्यापक तयारी गरिरहेको छ ।

दक्षिण कोरियामा कोरोना भाइरसको संक्रमण बढ्न थालेपछि सरकारले मास्कमा कमि हुन नदिन नयाँ व्यवस्था गरेको छ । जसअनुसार मास्क किन्न परिचयपत्र देखाउनु पर्ने व्यवस्था लागू गरिएको छ । ६ मार्चदेखि परिचयपत्र देखाएर हप्ताको बढिमा २ वटा मास्क बेच्ने कोरियन सरकारले घोषणा गरेको हो ।