हामी सबैकाे संसारन्यूज

३ वैशाख, काठमाडौँ। नेपाली युवा उद्यमी मञ्च चितवनले नारायणगढको पुलचोकमा शुद्धीकरण यन्त्र (अटोमेटिक स्यानिटाइजिङ मेसिन) सञ्चालनमा ल्याएको छ ।

लकडाउनका बेला पनि बाटामा हिड्ने बटुवा देखि अलपत्र परेकाहरुलाई सहयोग गर्दै आएको मञ्चले कोरोना भाइरसको जोखिम कम गर्न अटोमेटिक स्यानिटाइजिङ मेसिन सञ्चालनमा ल्याइएको हो ।

मेसिन चितवनका प्रमुख जिल्ला अधिकारी (प्रजिअ) नारायणप्रसाद भट्टराईले शुभारम्भ गरे । उनले जनताको स्वास्थ्य सुरक्षाको जिम्मेवारी वहन गरेर युवा उद्यमीले निकै सकारात्मक काम गरेको भन्दै प्रशंसा गरे । चितवन भित्रीने बटुवा तथा सवारी साधनमा यात्रा गर्नेहरुलाई टनेलमा छिराएर सेनिटाईजर गरेपछि मात्र चितवन भित्र्याइने हुँदा यसले गर्दा चितवनमा संक्रमण फैलने दर कम हुने पनि उनले विश्वास व्यक्त गरेका ।

बटुवा तथा अत्यावश्यक काममा सवारी साधन लिएर हिँडेका यात्रुहरूलाई पूरै शरीर शुद्धीकरण गरी पठाउने उद्देश्यले मेसिन राखिएको मञ्चका अध्यक्ष दाताराम घिमिरेले बताए ।

नवलपरासी हुँदै चितवन आउने यात्रुहरू सो मेसिनमा सेनिटाइज भएर मात्र प्रवेश गर्न पाउँछन् । मेसिनमा एकचोटिमा ४ जना व्यक्ति छिर्न सकिन्छ भने  १० सेकेन्डमा पुरै शरीरलाई अटोमेटिक सेनीटाइज गर्दछ ।  शुद्धीकरणका लागि १ हजार लिटर पानीमा ५०० एमएल स्यानिटाइज केमिकल मिसाउने गरिन्छ ।

नेपाली युवा उद्यमी मन्चको पहल र भरतपुर महानगरपालिका, जिल्ला प्रशासन कार्यालय चितवन, जिल्ला प्रहरी कार्यालय र उद्योग वाणिज्य संघ चितवनको समन्वय र सहजीकरणमा मेशिन निर्माण गरिएको मञ्चका पूर्व अध्यक्ष निरन्जन न्यौपानेले जानकारी दिए ।

यो मेसिनका लागि मञ्चले करिब डेढ लाख खर्च गरेको बताएको छ ।