Sansar News
६ बैशाख, काठमाण्डौं । केही दिनयता नेपाली मुद्रा नेरुसँग अमेरिकी डलरको बिनिमय दर निरन्तर उकालो लागिरहेको छ ।
सोहि क्रममा राष्ट्र बैंकले शुक्रबार एक अमेरिकी डलरको विनिमय दर १ सय २३ रुपैयाँ २८ पैसा (बिक्रिदर) तोक्यो । यो हाल सम्मकै उच्च हो । यसअघि बीहिबार १ अमेरिकी डलरको विनिमय दर १ सय २२ रुपैयाँ ६१ पैसा, चैत २७ मा १ सय २२ रुपैयाँ ५० पैसा र चैत ११ मा यस्तो विनिमय दर १ सय २२ रुपैयाँ ३४ पैसा थियो ।
पछिल्ला दिनमा डलरको तुलनामा नेरु निरन्तर कमजोर बन्दै गएको छ । राष्ट्र बैंकले शुक्रबारका लागि १ अमेरिकी डलरको खरिद दर १ सय २२ रुपैयाँ ६८ पैसा तोक्यो । यो पनि हालसम्मकै उच्च हो । अमेरिकी डलरको तुलनामा भारु कमजोर भएपछि नेरु र भारुबीच स्थिर विनिमय दर छ । स्थिर विनिमय दर घटबढ भएपछि नेरु पनि प्रत्यक्ष प्रभावित हुन्छ । अहिले पनि त्यहि भएको हो । यसअघि भारु बलियो हुँदा नेरु पनि बलियो भएको थियो । करिब डेढ वर्षअघि (०७५ असोज २४ मा) अमेरिकी डलरको विनिमय दर १ सय २० रुपैयाँ (१ सय १९ रुपैयाँ ३३ पैसा) हाराहारीमा थियो ।
विश्व बजारमा अमेरिकी अर्थतन्त्रको प्रभुत्व कायमै छ । त्यसैले पनि लगानीकर्तालाई भरपर्दो विकल्प अमेरिकी डलर बनेको छ । पछिल्ला एक वर्षयता विश्व बजारमा निरन्तरजसो उतार चढाव हुँदै आएको शनिबारको कान्तिपुर दैनिकमा समाचार छ ।
वि.सं.२०७७ वैशाख ६ शनिवार ०८:३७ मा प्रकाशित
