हामी सबैकाे संसारन्यूज

एक प्रदेश एक नमुनाबस्ती कार्यक्रमअनुरुप बर्दिवास नगरपालिका– २ स्थित दलित समुदायको मुसहरबस्तीमा अगामी २०७४ साल वैशाख मसान्तसम्ममा एकीकृत नमुनाबस्ती निर्माण गर्ने भएको हो ।

भूकम्पपीडितलाई पहिलो प्राथमिकतामा राख्दै एकिकृतबस्ती निर्माण गरेका धुर्मुस– सुन्तलीले तराईमा मानवता र सद्भावका लागि काम गर्न लागेको बताएका छन् ।

गाँस, बास र कपासको समेत समस्या रहेको मुसहरबस्तीमा बसोबास गर्ने ५० परिवारलाई उपहारस्वरुप घर प्रदान गर्न लागिएको धुर्मुस– सुन्तली फाउन्डेसनका अध्यक्ष सीताराम कट्टेलले बताएका छन् ।

रु चार करोड ७८ लाख लगानीमा निर्माण हुने बस्तीका लागि फाउन्डेसनले गिरान्चौर एकिकृत नमुनाबस्ती निर्माणबाट बचेका रु एक करोड ३ लाख ६६ हजार ३०१ सो बस्ती निर्माणका लागि खर्च गर्ने फाउन्डेसनकी कोषाध्यक्ष कुञ्जना घिमिरेले बताएकी छिन् ।

यहाँको ५० घरलाई आधुनिक वातावरणमा आधारित एकीकृत नमुनाबस्ती निर्माण गरिने छ, फाउन्डेसनका प्रबन्धक अर्जुन न्यौपानेले आधुनिक एवम् सभ्यवातावरणसहितको नमुनाबस्ती निर्माणका लागि सबैलाई आ–आफनो तर्फबाट सहयोग गर्न आग्रह गर्नुभयो ।

शिक्षकको माग गर्दै विद्यार्थी आन्दोलित

महोत्तरी सोन– ५ स्थित सरस्वती जनता माविका विद्यार्थी आन्दोलित भएका छन् ।

वर्षौदेखि विद्यालयमा माविस्तरको शिक्षकको अभाव रहँदासमेत सम्बन्धित निकायले कुनै पहल नगरेको भन्दै सो विद्यालयका विद्यार्थी आजदेखि विद्यालयको मूलगेटमा तालाबन्दी गरी आन्दोलनमा उत्रेका हुन ।

विसं २०१६ मा स्थापित सो विद्यालयमा हाल माविस्तरको एकजना शिक्षक मात्र कार्यरत रहेका छन् । शिक्षकको अभावमा समयमा विद्यार्थीलाई अध्यापन गराउन कठिनाई हुँदै आएको विद्यालयका प्रधानाध्यापक शत्रुधन यादवले बताउनुभयो ।

यससम्बन्धमा आफूले स्रोत केन्द्र सोनमाका स्रोत व्यक्ति ज्ञानेन्द्र यादव र जिल्ला शिक्षा कार्यालयमा पनि पटक पटक लिखित एवम् मौखिक रुपमा ध्यानाकर्षण गराउँदासमेत आश्वासनबाहेक शिक्षक पठाउनका लागि कुनै पहल नगरिएको प्रअ. यादवले बताउनुभयो ।

करिब एकहजार २०० विद्यार्थी अध्ययनरत रहेको सो विद्यालयमा १० जना शिक्षक मात्र कार्यरत रहेका छन् । रासस