हामी सबैकाे संसारन्यूज

१७ वैशाख, काठमाडौँ । नेपाल कम्युनिष्ट पाटी(नेकपा) का नेता तथा कृषिमन्त्री घनश्याम भुसालले संस्थागत प्रणालीभित्रबाटै समाधान खोज्न आग्रह गरेका छन् ।

नेकपाको सचिवालय बैठकको पुर्वसन्ध्यामा उनले सामाजिक संजाल मार्फत पार्टीको एकता बचाउन तथा लोकतन्त्र र समाजवादका मूल्यहरुको जगेर्ना गर्न नहडबडाउन, संवाद गर्न र संस्थागत प्रणालीभित्रैबाट समाधान खोज्न आग्रह गरेका हुन् ।

उनले भनेका छन् ‘२०५४ सालमा नेकपा एमाले लोकप्रियताको शिखरमा थियो, फुट्यो । र २०४७ सालको प्रजातन्त्र अस्थिर हुँदै गयो । २०६४ ६५ मा नेकपा माओवादी प्रलयकारी शक्तिकासाथ अगाडि आयो र विभाजनको प्रक्रियामा गयो । आज नेकपा असाधारण शक्ति र प्रभावका साथ उपस्थित छ । र यसमा समस्या थपिँदै गएका छन् । समस्याले उपयुक्त समाधान खोज्छ । अनुपयुक्त र गलत प्रयासले समस्यालाई झनै बढाउँछ । पार्टीको एकता बचाउन तथा लोकतन्त्र र समाजवादका मूल्यहरुको जगेर्ना गर्न पहिलो, नहडबडाउँ, दोस्रो संवाद गरौं र तेस्रो संस्थागत प्रणालीभित्रै समाधान खोजौं । आज मुलुकले सबै कमरेडहरुबाट जिम्मेवारी बोधको ऐतिहासिक गम्भीरता माग गरेको छ । ’