Sansar News
२४ वैशाख, काठमाडौँ । भोलि बैशाख २५ गते हुने स्थायी समिति बैठकको तयारीको लागी आज बस्ने सचिवालयको बैठकले सबैको रुपान्तरणमा ध्यान दिने गरी कार्ययोजना ल्याउन लागेको नेकपा उच्च स्रोतले बताएको छ ।
प्रधानमन्त्री निवास बालुवाटारमा आज अपरान्ह बस्ने सचिवालय बैठकले स्थायी समितिमा छलफल गर्ने एजेण्डा तय गर्ने समेत बताइएको छ ।
२० बैशाखमा बसेको सचिवालयले पार्टीलाई एक ढिक्का बनाएर लैजाने निर्णय गरे पनि स्थायी समितिमा कुन कुन विषयलाई छलफलका एजेण्डा बनाउने भन्नेमा शीर्ष नेताहरुबीच २३ गते सांझसम्म एकमत हुन सकेको थिएन । यद्धपि नेकपाका कार्यकारी अध्यक्ष प्रचण्ड र महासचिव विष्णु पौडेलले स्थायी समितिका एजेण्डा बनाउने जिम्मेवारी पाएका थिए । पाटीको एकता बलियो पार्ने र सबैलाई न्याय हुने गरी अध्यक्ष महासचिवको प्रस्ताव आउने अनुमान गरीएको छ ।
यसबिच भैसेपाटी गठबन्धन भत्किए पनि प्रचण्ड, झलनाथ, माधव र नारायणकाजिको भेटघाटले पनि रुपान्तरणकै कार्ययोजनाबाट पार्टी बलियो हुने ठहर गर्दै निकटका स्थायी समिति सदस्यहरुलाई भाव संप्रेषण गरेको बताइएको छ ।
उपाध्यक्ष बामदेव गौतमको साथ पाएपछि सचिवालयको बहुमतमा पुगेका प्रधानमन्त्री केपी शर्मा ओलीका लागि भोली वैशाख २५ मा बस्ने स्थायी कमिटी बैठक पेचिलो बन्ने अनुमान गरीएको छ । प्रचण्ड माधव निकट स्थायी कमिटीका करिब दुई तिहाई सदस्यहरुले एक ब्यक्ति एक पद अबिलम्ब कार्यान्वयनको माग गर्ने तयारी गरेका छन । ओली निकट सुत्रका अनुसार प्रधानमन्त्री ओलि पनि एक ब्यक्ति एक पदमा लगभग सहमत मै पुगेका छन् ।
वि.सं.२०७७ वैशाख २४ बुधवार ११:३३ मा प्रकाशित
