हामी सबैकाे संसारन्यूज

अहिले सम्मकै ठूलो खडेरी परेपछि वाइ गाविसका ५, ६ र ७ वडाका किसान खाद्य सङ्कटको मारमा परेका हुन । तीन वर्षदेखि वर्षा र हिमपात नहुँदा बाली लगाउन नपाएर खाद्य सङ्कट सुरु भएपछि उनीहरु खाद्यान्नका लागि विभिन्न निकायमा धाउन थालेका छन ।

खडेरीका कारण वाइ गाविसका तीन वडा र अन्य छिमेकी गाविसका अधिकांश गाउँमा खाद्यान्न उत्पादन नहुने भएपछि अहिले किसानहरु खाद्य असुरक्षामा परेको जिल्ला कृषि विकास कार्यालय बाजुराका कृषि विकास अधिकृत डा रामकृष्ण श्रेष्ठले बताउनुभयो ।

खडेरीका कारण बर्खे बाली डढेर सखाप हुनुका साथै सिँचाइको अभावमा खेत बाँझै भएका छन् । खडेरीको मारमा परेका वाइ गाविससहित जगन्नाथ, बाँधु रुगीन, गोत्री, कोल्टीलगायत ११ गाविस खाद्य सङ्कटको सूचीमा परेका छन् ।

खाद्य सङ्कट र खाद्यान्न अभावपछि वाइ गाविसका करिब ४०० भन्दा बढी पुरुष रोजगारीका लागि भारत र कतिपय युवाहरु विदेशीएका छन् ।

खाद्य सङ्कटले गाँजेपछि विद्यालय जाने उमेर समूहका बालबालिकासमेत विद्यालय छाडेर कामका लागि भारत छिरेका छन् । “तीन वर्षदेखि बारीमा हरियो देख्न पाएका छ्रैनौँ,” वाइ–७ का अन्रुपा महत्तराले भन्नुभयो – “श्रीमान्ले भारतमा गएर कमाएर पठाएको पैसाले खाद्यान्न किनेर बालबच्चा र आफू पालिने गरेका छौं ।”

कृषि विकास अधिकृत श्रेष्ठसहितको एक टोलीले एक सातासम्म सो क्षेत्रको अध्ययन गरी फर्केका छन् । टोलीले यस वर्ष सो क्षेत्रमा उत्पादन घटेर खाद्यान्न समस्या हुने निष्कर्ष निकालेको छ । “पानी नपरेकाले खेतका गरामा धाँजा फाटेको छ । यस क्षेत्रका अधिकांश जमिनमा आकाशे पानीको भरमा खेती हुने गर्दछन्”–अधिकृत श्रेष्ठले भन्नुभयो । रासस